#NSS文化
[GUEST] 事先聲明，我寫呢篇文完全冇意思要diu 9任何人。
語氣重咗嘅地方大家見諒。
呢排見到有陣時有人會放一啲自己寫出嚟嘅散文/短故上NSS，然後文筆唔錯，大家就覺得佢可以出得書、作文5**。明白大家有陣時其實係想要鼓勵樓主，但係我唔排除有人其實真係睇完你哋嘅留言，諗緊呢啲嘢可以成真。覺得寫文寫得唔錯，就可以出書做作家。
咁我睇咗的確係唔錯嘅，但係大家有冇諗過出書同埋5**呢兩樣嘢個門檻究竟有幾高。其實係你哋自己對眼比較低丫，定係你哋唔係好知道現況係點呢？
首先由5**講起，文筆只係其中一個評分嘅準則，文筆好但係離晒題你照樣都係得個2，所以樓主喺呢一方面係完全講啱晒。就算文筆幾好，拎去參加徵文比賽拎晒獎都好，返到學校老師照樣俾個唔合格你。我係過來人，我最明白嗰種感受，徵文比賽拎晒獎，我連大陸人都打低埋，返到去學校10分滿分嘅作文，我照樣拎4分。因為佢根本唔係用緊一個文學嘅標準去睇呢篇文，佢只係用一個考試嘅標準評核你嗰篇文有冇得分。文得比所有人讚嘅我，我照樣唔敢講我到時DSE可以拎五星星中文作文。好，我相信呢樣嘢應該唔只我一個人講過，樓主都好清晰，所以我呼籲大家唔好見到人哋嘅文筆好似比你好好多就會覺得人哋一定係拎緊高分。其實我哋唔係好你好多，只不過偶然喺文筆上面可能會得到人嘅賞識。文筆呢樣嘢都唔係咩天賦，好多時候都係靠努力睇書模仿人哋嘅文筆而得翻黎。你見到我哋寫嘅每一篇文，背後都可能係我哋多年睇書以來累積嘅所有文句辭藻。
好第二樣嘢，出書。
大家係咪仲覺得寫一篇文文筆好好就可以出到書？首先一本書起碼有八萬字，係唔係每一個寫到2000字文筆好好嘅人，都等於可以寫到八萬字優秀嘅作品？好啦，就算當你寫到八萬字出嚟之後，你要點樣出版？你知唔知其實而家絕大部份嘅出版社好多人不斷投稿，但係冇人應。因為作者遠多於讀者，寫作呢個行業不嬲都係式微緊，我相信呢樣嘢大家都知。只要出版社覺得你個作品冇價值，佢絕對唔會簽約。就算俾你搵到出版社簽約都好，只要唔係一間大嘅出版社，你三個月做盡宣傳上埋IG賣廣告，最多都係賣到40本書。真正投身寫作呢一個行業，大部分未成名嘅人，幾乎每日都係作者求緊讀者嚟睇佢啲書留一條留言作者都會覺得好感動。所以唔好睇嗰啲孤泣果D大作家經常有人買佢嘅書，你就覺得出書唔係好難啫。事實係大家不斷email投稿投稿投稿，冇人應過我哋。Penana寫左20萬字，肝都爆埋，辛苦經營咁多年嘅能力，我都唔敢幻想我可以出書。
我哋會檢討自己係咪出咗問題，要求唔同嘅同等作家評論我哋嘅作品，但係大家最後得出一個答案：大家時運未到，唔係我地唔夠出面嘅作家寫得好、能力不足，甚至我哋大部份人都可以屌打出面所謂嘅「成名」作家，但係根本就冇人肯出我哋啲書，未成名你乜都唔係。我有時候覺得我哋好似乞衣咁，係咁求人、咩都做晒，為咩？
而當時喺下面留言話睇你出書嘅人，最後係咪真係會買你啲書？定係佢哋淨係純粹嗌你行入個苦海裏邊？就算真係買都好，做你忠實fans，又總共有幾多本書賣出去？你最後又要蝕幾多錢離場？
所以我希望大家唔好比樓主假希望。亦都唔好以一個門外漢嘅角度，覺得出書好容易，5**好容易，作家舒服，睇Lihkg多就覺得出書門檻低。
sorry，呢篇文可能會得罪大家，覺得忠言逆耳。
但請大家體諒我，原諒我的文字義憤填膺，原諒我急欲讓大家清醒，原諒我因為寫作揮霍多年青春，最後卻變成表面滿腔熱血，但又偷偷把自己文字藏起來，並且對你們所有人的鼓勵麻木的人。我不敢去數自己為了那虛無飄渺的夢想失去過的東西，甚至不敢在別人面前提起我這幾年做過些什麼，每次面對家人的追問我都是支支吾吾糊弄過去。寫出好文章的人固然都是有努力過，但請大家不要報以假希望。不要偶爾看見奇蹟，便說那是俯首皆是的機會。看見還沒有成功的人，然後說幾句風涼話說，你沒遇見只是你能力準備不足。
奇蹟不是每天都在發生的，起碼沒有發生在任何人身上。沒有發生在我身邊人身上，更沒有發生在我身上。
最後我只是想說一句，「我真的已經很努力了。」
一個深陷寫作苦海七年仍無法出書、深夜情感爆發嘅同路人
2022.03.03撰
（放負文）