#NSS個人
[guest] 以下篇文係一篇有啲長嘅放負文 如果你地唔想睇嘅話請直接skip咗佢
大家好，我係一個form 3學生。由細到大，我比人嘅印象都係好有自信、樂觀正面嘅人，就好似一個領導者。
我父母都係基層出身，佢哋當年係靠攞獎學金先至可以讀到大學。佢哋唔想我行返呢條冤枉路，所以佢哋對有極大期望。
我嘅每一日基本上都係扮到自己生活好似好充實，迫自己要比人一種生活得好快樂嘅感覺，所以我成日都對住人笑，然後又安排好多活動比自己參加，因為我知道，實際上嘅我其實內心非常之空虛、寂寞。
我強迫自己用盡方法，喺考試、測驗，每一科點都要考到七、八十分，甚至90分，又要令自己成為老師會偏心、同學會羨慕嘅學生。我的確成功咗，不過我都只係覺得自己好似一部機械人咁樣，只會死記硬背。
呢幾年，我已經由一個會真正地因為開心而笑嘅人漸漸地變成一個只會假笑、扮開心嘅人。我覺得自己就好似一個戴咗面具嘅人，冇人知道自己真身，只有自己先知道。
每一晚，我訓上張床，自己個腦就會自動開始胡思亂想，一諗就喊，所以往往都會喊到又暈又嘔，甚至有時喊到呼吸唔到。我用咗好多方法，令自己唔好咁容易胡思亂想同埋令自己唔好喊，但係我就反而迫到自己麻木，唔會再流露出自己嘅真實感受。
除咗喊，我仲會覺得自己好自卑、好似壓力爆煲嘅感覺，因為為咗成功，我放棄咗好多玩、放鬆嘅時間，因為我父母覺得勤有功戲無益，所以我為咗唔好令佢哋失望，所以我強迫自己成為一個符合哂我父母期望嘅子女。
我嘅分享去到呢度，我打呢篇文出嚟係希望大家睇完之後唔會再比太大壓力自己，我唔想再有下一個自己。所有人都要加油。
sor for 1999