#NSS社會
[GUEST] 點解香港人對LGBT嘅意見都咁落後？
時不時，網上面都會見到香港人好鍾意講嘅一句：「我尊重LGBT，亦唔會歧視佢哋，但係我冇責任去支持佢哋。」其實講呢句嘢嘅人，到底知唔知自己講緊咩？
「我尊重性取向直嘅，我唔會歧視佢哋，但係我唔支持佢哋鍾意異性」又合唔合理？呢啲嘢係由我哋選擇支唔支持嘅咩？你唔支持我哋，又何來係尊重我哋？你唔打我哋、唔侮辱我哋、唔欺凌我哋，咁就叫尊重？
支持LGBT，唔係要你當我哋高人一等。唔係因為我gay所以我做咩你都要支持。唔係要你嘗試做LGBT。唔係我鍾意咩人，你都要接受佢個性格同人品，點都要討好佢。
當我哋出櫃嘅時候，我哋最close嘅朋友，都可能會離我哋而去；而我哋嘅屋企人，都可能會唔接受我哋，鬧我哋打我哋，甚至唔再愛我哋。喺街上面，兩個相愛嘅同性會驚似一對情侶。一拖手，可能會俾行過嘅人用唔歡迎嘅眼神啤住，俾人暗中議論，俾人無端端鬧。
支持LGBT，係喺呢啲我哋最脆弱、最無助，當其他人都離開我哋嘅時候，你都仍然會企喺我哋嗰邊，同我哋講：「我支持你去做真正嘅自己」，明白到我哋其實同普通人無異。支持，係當我哋俾人歧視，俾人無理對待，俾人攞嚟當笑話嘅時候，你會走出嚟幫我哋，同你幫自己嘅朋友一樣。
LGBT唔淨只係你又一個嘅政治討論——背後嘅，係一堆堆活生生嘅人。呢啲人，係你嘅朋友，係你嘅同學，係你日日見到嘅人，係你身邊嘅人。
身為一個gay嘅香港學生，有時我會喺度諗，點解我作為一個人，明明同你一樣，但係大個之後，我又冇權利去同相親相愛嘅人結婚？
點解香港人望到我，可以咁無恥咁講：「因為你係gay，所以我唔會接受你」？點解當我為自己嘅身份辯護，你可以咁荒謬咁話我唔尊重反對嘅聲音，所以啲人先唔支持我哋？
我好攰啊。點解我需要捍衛自己嘅存在、自己嘅價值，同最基本嘅權利？點解咁都有爭議？我係gay嘅我冇得揀，雖然身邊嘅人唔接受我所以我唔可以做真正嘅自己，雖然因為我人生複雜咗、困難咗，但係我自豪。有得畀我揀，我都會揀做gay。
我自豪，因為呢個就係我最基本嘅身份。