#NSS愛情
[GUEST] 我暗戀咗一個男仔朋友5年
小弟今年中六，準備考dse。回顧番成個中學生涯，有好多同朋友一齊玩一齊溫書既回憶，但因為疫情，發現都有幾多遺憾，不過最遺憾都係唔敢同自己中意既人表白。我自己算係一個深櫃，就算係我最好既朋友到而家就快畢業都唔知我係gay，我亦都無出櫃既打算，所以我先想投稿泥抒發下自己呢幾年既心事，順便做一個簡單既表白。
我暗戀既呢個朋友，以下簡稱E先生，佢係一個好靚仔又好身材既學霸，佢每年都係全級頭幾。我哋中一已經同班，嗰陣未係好熟，我哋真正開始熟係中二既時候，我哋因為成班fd一齊打機同打波變熟咗。嗰陣其實已經有少少中意咗佢，我哋嗰時成日會玩到好夜，仲會一齊食埋飯，呢段時間真係好美好同好青春。
中三嗰陣我同E先生去咗唔同班，大家交流少咗，佢都識咗D新fd，我哋關係疏遠咗唔少，但我哋依然會keep住時不時一齊打波打機，係小息嗰陣都會一齊傾下計，我亦都繼續中意佢。雖然係咁，但我一直都無表白既勇氣，因為我知道佢係直男，一定唔會中意我，如果表白唔單止一定會失敗，仲可能會連朋友都無得做，咁不如都係一直維持最安好既距離，繼續做朋友算。而且，我自己條件都好差，成績唔好,小薯一個，佢就啱啱相反，我心唸:如果有男仔同E先生表白，E先生都應該想係一個靚仔，而唔係一個薯仔。所以呢個係注定失敗既表白，為咗保留自己少少尊嚴，我都係選擇主動放棄。
上到中四，我同E先生都係簡同一科所以又同班，我哋又變番好似低form嗰陣咁熟，我以為自己已經係一個好了解佢既朋友，點知係一次偶然既機會下，我知道咗佢已經有女朋友，由中三開始已經一齊差唔多拍咗一年拖。我當下聽到既時候都呆咗，為咗掩飾自己既失落，我繼續強顏歡笑，其實暗地裏個心已經喊緊。我番到屋企都終於忍唔住喊咗，你可能會覺得既然本身都無唸住表白，有咩好喊，佢有女朋友都無得控制。但我想講佢有女朋友呢件事，我應該係E先生班fd入面最遲先知，其他人原來好早已經知，加上E先生係學校一直都無咩點同佢女朋友交流，所以我都唔知原來佢已經有女。我喊係因為佢比我既感覺係原來我係佢心目中既地位唔係太重要，我哋既關係未去到可以將好多嘢拎出泥講既地步，我都唔會怪E先生無同我講，佢本身都應該唔太想咁多人知。
喊完之後，我收拾好自己既情緒，繼續番正常既生活，我照樣當咩事都無發生繼續同E先生相處，雖然內心依然會有D唔開心，但我會同自己講我同E先生仲係好朋友，有得陪係佢身邊繼續一齊玩已經好好，所以唔好再咁唔開心。
中四下學期開始變咗上網課，我同E先生少咗見面，仲少咗好多對話，我一直好希望快D復課，比我見到佢。直到終於復課，我又可以見番佢，可以同佢一齊打波食飯，放暑假嗰陣仲一齊去游水同埋去海洋公園玩，我哋亦都越泥越close，E先生都慢慢開始同我傾多咗計。有次，我因為學業既事而喊，佢安慰番我仲講D爛gag引我笑。我嗰陣真係覺得好溫暖，佢真係一個好好既男仔，好照顧身邊既人，雖然有時把口比較賤，激到我打佢，不過佢係我心目中都係一個好重要既人。我知道我同E先生係無可能，但我已經好感恩可以一直做佢既朋友。
E先生，我哋就快畢業啦，我仲中意緊你，雖然你仲會成日整蠱我蝦下我，但我既心意都無變過，你到而家應該都未知我既心意，甚或者你呢一世應該都唔會知。但我都好想係度講一句:我中意你!唔知我哋將來出到泥社會之後，會唔會仲會好似而家咁fd，不過我都希望你同你女朋友可以繼續幸福，我會學習放低呢段感情，去搵真正屬於自己既幸福。我都希望睇到呢篇文既人，唔好好似我咁懦弱，真係中意既就去追啦。
唔該晒admin🙏🏻
Sor for 1999