#NSS個人
[Guest] [長文慎入]小弟今年15，唔知點解越嚟越少friend，每個friend都好似遠嚟緊我咁。 而家每日過緊嘅生活就好似生活喺一個唔係屬於將自己嘅世界， 唔知點解喺呢一個生活節奏咁快嘅香港，我好似格格不入， 好似多出嚟咁樣。 其實我都唔知我做錯咗啲乜嘢，定係可能我性格問題？
其實我本身由小學開始其實我性格都算外向， 但嗰陣細個啦，就可能對女仔有啲怕醜，不過都唔係重點。我好鍾意同人哋玩同傾計， 其實小學入面我都有好多朋友， 我好enjoy一班人去玩去癲嗰個感覺， 因為嗰陣都大家住得好近， 好方便大家玩， 但自從p5p6之後。 我搬咗屋， 距離學校起碼都要一個鐘嘅車程， 無庸置疑，會接觸少咗。 但我都好努力去維繫同呢班朋友嘅感情，因為呢班朋友都係由一入小學已經開始識， 所以我唔想失去， 但到最後而家都已經冇聯絡。
升上中一之後， 其實都有唔少小學同學都同我同一間中學， 甚至我好彩地同佢他同一班㖭，我以為一切可以保留原本咁好， 但一切都只係我以為， 學期初我仲保持到唔差，有啲科都有top10， 但係成績每況愈下。 中一嗰陣其實我識到唔少朋友， 我曾經都以為我係佢哋嘅一份子。 但佢哋其實有冇我都冇咩所謂。
升到中二之後， 終於知道收斂下， 因為平時我都唔知醜字點寫同唔顧及形象。 開始內向咗， 有啲介意人哋點樣睇自己。 直至遇到咗我初戀， 其實我嗰陣都唔知咩叫愛， 淨係覺得呢個女仔對我好好， 我都幾鍾意佢就一齊咗。 我哋熱戀嘅時間唔係好長， 嗰陣我認為我需要更多空間， 佢都好認同我同畀咗好多空間我， 但我就好犯賤， 冇好好咁珍惜， 仲成日忽冷忽熱，甚至冷暴力。 直至到佢提出分手， 我有氹返佢，氹咗佢好耐， 又山盟海誓點點點， 但其實都冇咩點兌現過太多。 隔咗冇幾耐，我又重蹈覆轍， 其實佢已經原諒咗我好多次， 可能我已經麻木，覺得好似好平凡咁嘅， 但到佢最後一次提出分手， 我終於先醒。 其實我眼前嘅女仔真係好好， 我 未散之前成日希望佢肯為我改， 但其實佢一直為我改變緊， 改變到佢自己都唔似自己。 我知道我實在欠佢太多，一次又一次咁傷害佢，對唔住。如果你有睇呢度嘅話，我一直都想同你講清楚，我實在辜負你太多，但我唔知點樣面對你。我好後悔，更多嘅係我怪責我自己點解咁做。好入返正題先， 就係我同佢散咗之後， 唔知係咪因為我同佢拍拖嗰陣冇咩顧及佢感受， 所以我變得好在意其他人嘅感受， 好介意 人哋講嘅每一句嘢。
我鍾意表演，但係好多人會批評我鬧我，所以我變得冇咁鍾意表達自己， 可能呢個原因， 所以我識唔到朋友？ 但其實我年年都有做班會， 成日出席社活動，甚至參加課外活動，其中一個目的係想識到更多嘅朋友，我好想識多更多人， 或者識到一啲交心嘅朋友 但好可惜遇唔到。
去到中三，我叫返一啲耐冇聯絡嘅小學frd、一啲中學同學、同我熟嘅網友，介紹大家畀大家識，我想大家group埋一班人一齊玩 。隔咗冇耐，真係如我所願，成班人都玩得好融洽包括我自己。我有個女仔friend (下稱c小姐), c小姐同我玩咗一排之後，我每次同佢相處都覺得好舒服，唔使講嘢都覺得好舒服，所以我漸漸地鍾意咗c小姐。佢以為我鍾意佢一個好朋友，其實只不過佢個好朋友知道我鍾意c小姐，亦都睇得出c小姐鍾意我。我同佢個好朋友嗰陣都幾熟，佢個好朋友成日同我講做男人唔好咁婆媽， 係鍾意人就表白啦。 咁我最後成功表咗白， 佢受咗， 但隔咗幾個月之後就分咗了。好，又入返正題先， 我同佢散咗之後 班friend 排擠咗我， 其實我都唔知點解係我走唔係佢走，個班friend原本個個同我都熟，哈哈， 所以我都有時喊， 我真係諗唔明點解我咁努力相識到一班朋友，識到一啲真心嘅朋友 但係都遇唔到。 我有諗過係咪我自己藝術家性格嘅問題， 需要有空閒，鍾意有自己一套嘅處事方式，活在當下享受生活。其實我真係有試過嘗試融入佢哋，但我逼自己做唔自己唔鍾意嘅嘢真係好辛苦， 所以 到最後我都係選擇放棄。
算啦， life Must Go On, 冇交心朋友都唔係第一日嘅事。 小弟希望大家可以畀啲意見畀我點樣改善。 唔好diu得我咁大力🥺