#NSS個人
[[GUEST]] 就咁嘅，我朋友條女佔有慾大到連佢阿媽都可能未必想認佢。
介紹少少背景先，小弟同我朋友(以下將稱呼佢為Y)都有10年好友咁耐。Y近排就喺交友app度識咗個女仔，仲拍埋拖添。咁作為朋友嘅我，見證住做咗17年毒撚嘅Y終於生生性性出到pool，梗係開心到要佢請我食出pool飯。Y不但只應承咗，仲話會帶埋佢條女比我識(利申.個女仔同意Y帶佢去識我)。我以為呢一餐應該會正正常常咁度過，點知原來係惡夢嘅開端。
我哋入到餐廳，一坐底個女仔好嬲咁睥到我實一實，仲黑口黑面。而Y好似自動無視咗，成個人好似淡淡定，有錢淨咁，彷彿已習以為常。大佬，我被個女仔睥到好唔淡定呀！我甚至覺得佢下一秒要拎住枝叉吉落我喉嚨度。雖然我係一個平平無奇嘅毒撚，但我無喺嗰個女仔面對冇做過任何衰嘢，唔使睥到我咁死呀嘛？當我係啤啤熊咩？喺呢個尷尬嘅氛圍下，我決定ig叫Y同佢條女講唔好再望我，去玩手機，我驚驚。
點知我一send完message，Y嘅手機通知響咗，個女仔即刻發哂癲話邊個搵佢，唔係講好咗要同所有人講佢哋出去期間唔好搵佢咩，係咩有咗第二個。嗰一刻我呆咗，擔心緊我會唔會搞到Y單身solo返之如仲搞到佢小命不保。之後Y想解釋返但慘被個女仔一巴命中佢塊臉並奪門而出，Y即刻衝上前追佢，淨底我尷尬地坐喺餐廳度被迫幫佢哋埋單。
事後我立即打電話問Y佢哋兩個點樣。Y話冇問題，但佢之後話佢條女叫我哋少啲見，驚我搶走Y，好憎我。我對於呢一切已經無力再呻落去，只好無奈覆句“哦”就cut線。
原來唔但只有異性冇人性係真實存在，連癲婆都係真實存在，仲要係我朋友條女。經過今日一事，我真係大開眼界。而家望住Y似隻狗咁聽哂佢條女話真係冇眼睇，成個女友寶咁。甚至唔但我遭受到呢個匪夷所思嘅事，連其他朋友都話Y條女禁止佢同佢哋出去。Y同學啊，你似返個人唔會甩皮甩骨㗎，最多咪被個女仔鬧幾句，你而家咁樣成何體統呀？
我曾經親自上Y屋企嘗試屌醒佢，但佢已經洗腦哂，講咩都話佢愛佢條女，唔會分手。
Y先生，我知你有fol開呢個page，你醒下啦好嘛？你條女唔LOVE你呀，當你係狗同佔有慾爆棚咋。我真係唔信我哋十年交情會輸比一個得幾個月嘅戀情囉！我識開嘅嗰個當艾倫·耶格係偶像咁崇拜，話要追尋自由嘅傻仔去咗邊呀？你而家比個女仔束縛住，你係籠中鳥啊。你條撚樣同我快啲死返出嚟，個女仔真心愛你嘅話就唔會咩都限制住你啦！戀愛大過天呢句嘢玩鳩你咋。
麻煩各位幫手屌醒呢隻迷途小羔羊，我唔想再望住Y越陷越深，唔該！
第一次投稿，Sorry for 1999!!!
麻煩Admin po ig!!!