#NSS家庭
[guest] *Sorry呢篇應該係長文*
我已經矛盾咗好耐，最近先鼓起勇氣投稿，認到係我嘅人希望唔好@我
是咁的
我啊媽成世人有大半時間都係付出喺我屋企到。佢當年因為成績問題佢讀唔到中七，之後就返咗好耐夜校，一邊半工半讀，兜兜轉轉咗好耐先可以大學畢業。然而嗰陣佢已經陀緊我啊哥，之後佢嘅人生都係返工放工同打理家庭，佢完全無時間去實現自己嘅理想。而佢一直都好渴望可以移民到外國，呢個係佢盼咗幾廿年嘅夢想。所以當英國一開放BNO人士移民，佢好開心，又好踴躍咁調查英國嘅資料，連無乜點用嘅社交媒體都開始用，入面入嘅全部都係有關英國嘅群組，每日睇嘅片都係有關移民英國嘅。
雖然佢好渴望去英國，但係我啊爸係唔同意嘅。典型藍絲就係徘徊喺舒適圈到，唔肯踏出去。問題係我啊媽根本無足夠金錢去英國生活，佢唯一諗到嘅方法就係賣咗層樓，用嗰筆錢去英國生活。但由於層樓個名係我啊媽同啊爸，我啊爸一日唔同意，啊媽都無得攞到筆錢。
而可以說服到我啊爸捨得賣樓嘅關鍵就係我。如果我肯同啊媽去英國，為咗我嘅前途問題，我啊爸係肯賣咗層樓嘅。
睇到呢到，可能你哋會覺得我跟著啊媽去英國咪得囉。但係，我自己想去嘅根本唔係英國而係日本。當然，我唔係討厭英國，只係我放喺第一位嘅會係日本，而唔係英國。移民日本係我夢想，而我為咗去日本都付出咗好多努力，自己私底下學日文、考日文，又有去參加日本留學試，我對自己未來嘅都有構思好多。我有諗過自己跟住啊媽去英國，讀幾年書攞到英國護照再自己去日本嘅，但係去英國讀書使費唔平，啊媽話既然使咗咁多錢，又咁辛苦攞到本護照就留喺嗰度，我無乜機會走到。
我明白啊媽好想去英國，但係為咗佢我就要放棄我嘅一生？我知道去英國有好多好處，但係我嘅意願真係唔值得關注？我好矛盾，我想啊媽幸福但又想實現自己夢想。而呢個時候啊爸就嚟「關心」我，佢話擔心我過到去英國會被人bully，又話自己年記大去英國熬唔到。我唔希望有任何一方受苦，但又唔知點做好，情況就係咁膠着咗好耐。
有無情況同我相似嘅人可以分享下你嘅經驗？或者有無人可以比下意見？我自認我太單純，又自私，唔願付出又想獲取更多，希望有人可以屌醒我(｡ ́︿ ̀｡)