#NSS個人
[GUEST] 長文注意
小妹F2，一直覺得自己係零，受各方面問題困擾，開始出現焦慮症狀。
社交方面，我覺得自己無法真正融入同學嘅圈子。我小學時考全級頭三名，但因為肥、內向，又唔識流行娛樂(電視節目/藝人明星)，所以喺高小幾乎冇朋友。升上中學，我最初都係肥，但同學都對我友善，我都識到幾個真心朋友。後來到F2，同學來自唔同班，佢哋自己有小圈子，同隔離班啲人好熟，而我呢？有啲同學同我都算係朋友，我都唔至於被孤立，但就係冇辦法真正融入成為佢哋一份子。之前見住佢哋出story，放假又一齊去迪士尼/OP，我仲係同緊屋企人去；佢哋生日喺story長文互tag祝福，我生日又冇人dm講「生快」，我感覺到一種落差。我諗過係咪因為佢哋個個都瘦，我又少少肥(156/50)，樣又普通，所以就冇咁多朋友，但全班最肥嗰個(目測165/70)，四眼普通樣都有6-7個好朋友。我又諗過係咪我對佢哋唔好，但我又唔係，我只係正常咁喺學校度過每日。我覺得自己好廢，唔被人重視。
學業方面，我一直搵唔到動機溫習，拖延症點都改唔到。而家放假，我成日想溫習，但唔夠1個鐘又會開始分心，就係搵唔到興趣/動力去專心溫習全日，復課後會有UT，我覺得咁樣落去唔得。我覺得溫習、功課好苦悶，所以唔想做，但見到其他同學都努力緊，我覺得自責。
個人身形方面，我由細到大都肥，之前瘦咗少少，由當初嘅57kg變咗47kg，聖誕肥咗，1mm都冇高過，只係重到50kg。為咗可以好睇啲，我想減到48kg，但夜晚唔食碳水，多咗喺屋企食飯，日日運動都仲係停滯，體重冇減，唔好話我肌肉多咗，因為我體形都冇變化。鍾意嘅人係瘦啲嘅，有個瘦嘅女仔好似都鍾意佢，停課前日日小息見到嗰個女仔入嚟課室搵佢，以及其他同學傾偈，仲聽到我班上同嗰個女仔friend嘅女同學同我講：「XXX(嗰個女仔)唔會原諒你，話你咁肥都有面鍾意嗰個男仔。」我覺得好無力，我咁肥一定冇人會鍾意我，我唔想返學見人，最後幾日都係打鐘前五分鐘先敢入課室。我只想減到理想嘅體重，令自己更有自信。
停課期間，隨咗問功課外，冇同學主動wtsapp我，我又冇面主動搵人。連P6嘅阿妹日日都同朋友視像傾偈/一齊做功課，我都冇，我覺得自己係零。朋友又唔多，讀書又唔好，又因為身形而自卑，我厭倦嘅係自己。我已經唔再鍾意嗰個人，但我仲係討厭自己身材。我發現自己演變到開始有焦慮嘅症狀，日日覺得不安，小小事都發脾氣，又成日諗人地會唔會好討厭我，會唔會怪責我。
而家我有幾個問題：
1. 減肥一直停滯緊，點樣可以有效減肥？運動、飲食都得。唔好同我講「而家已經好好，唔使減」之類嘅，我只係想瘦咗之後着自己鍾意嘅衫，我之前連短褲都冇自信着。
2. 點先可以喺疫情期間保持讀書啲動力？
3. 點樣可以喺學校融入到社交圈子？我唔係冇朋友，啲朋友都唔算係好外向嗰種，但我想真正融入圈子，停課日日聯絡，復課後日日小息一齊。
4. 多謝你睇到呢度^_^