#NSS其他
[Guest] 如果身邊有朋友來緊要去外國讀書/移民，請轉發呢篇文章
你好，雖然我地唔認識，但我知道你來緊就要踏上一個全新嘅旅途，祝你一切順利。喺你出發前，我有D嘢想同你講，希望可以比到一啲鼓勵你
簡單講下我嘅背景，我係一個已經出國接近2年嘅15歲女學生，我係自己一個去，唔係移民。
點解我會寫這篇嘢？其實我身邊都有唔少人去外國留學/移民，大家都流著淚話好想返去自己熟悉嘅地方，見到熟悉嘅人，聽到熟悉嘅語言，食到熟悉嘅味道。可能而家你會覺得你好討厭家鄉，但請容許我同你講聲，遲D你就唔會有呢種想法。一定要用正面嘅想法來面對一切。
（呢篇野有兩部分，請根據你嘅現況來選擇適合你嘅部分來閱讀，當然你可以兩部分都睇曬）
移民
同屋企人移民嘅你，起碼會有家人嘅陪伴，有咩事都會有家人係你身邊幫助你。但係，移民係一件好辛苦嘅事，要永遠離開家鄉，唔係人人做到。已經決定好要移民嘅你地，請你一定要記住，你地比起任何人都要堅強。
呢個時候就要好好回報一下家人啦，移民需要花費大量金錢，勇氣同意志。可能，試下根據你屋企嘅狀況，答謝一下佢哋？就算只係一啲手作嘅小禮物，或者一個擁抱，都可以為佢哋增加大大嘅動力，療補一下佢哋佢哋因要離開家鄉而受到嘅痛苦同傷害。
無論你移民嘅原因係咩都好，你可以做出呢個選擇，就係因為你見到呢條路有光，even係一粒好細嘅光。
希望在明天啊嗎，呢粒光一定會引導你去到更加好嘅路。
（對於移民我一啲都唔了解，所以我冇乜資訊可以比到你，抱歉抱歉～）
獨自去外國
自己去外國嘅你
恭喜你，你選擇咗一條會快速並且有效增值自己嘅路。期間你會學到好多係你舒適圈學唔到嘅嘢，至於係咩我就唔講啦，等你自己去發掘啦！
雖然你會得到好多，但當然呢個世界係冇不勞而獲㗎，係得到嘅同時你都會失去一啲嘢，例如係同家人朋友係家鄉相處嘅時光。
要面對嘅嘢，每個人都唔同，但唯一個個都會面臨嘅就係孤獨。唔係因為身邊冇人陪伴，係你長期離開熟悉嘅地方而產生嘅孤獨感。雖然你冇可能見到你嘅家人同朋友，但佢哋永遠都係到陪住你，支持你，係一份大家都見唔到，但深深感受到嘅愛同關懷。
辛苦就一定㗎啦，到時係你落淚嘅時候，不如諗下你出國嘅原因？我相信一定會有啲正面嘅原因㗎！
加油！