#NSS社會
[GUEST] 之前我打機識咗個朋友，但係佢最近忙緊學校嘅事，唔得閒打機，咁我就問佢最近發生啲咩事搞到咁忙，跟住佢就同我講咗呢一件事。
佢間學校大約三年前換咗個新嘅女訓導老師，個訓導老師好嚴，成日建立一啲新嘅唔合理嘅校規，而且佢永遠都唔會聽啲學生講嘢，仲要極度偏心，佢唔鍾意嘅同學就要特登去搵個方法罰佢。但係啲同學都慣咗，因為之前嗰幾個男訓導主任都係差唔多咁嘅樣。但係最近個女訓導老師下令所有人都唔比帶智能手機返學，就算熄咗電話，鎖locker都唔畀帶返學，呢一次啲同學就終於唔忍，開始去反抗，由其中一位師兄領導，但係佢哋就諗住用特別嘅方式去反抗， 佢哋諗住搵校規嘅漏洞，然後特登去踩灰色地帶，搞到個訓導主任好忙，不斷去捉人犯校規，同埋查同學有冇罰抄校規，最後就收回嗰一條校規，之後嗰一日佢哋全部人就帶nokia老爺機返學，就話呢一部唔係智能手機只係一部電話，佢哋就叫呢一個行動係不合作運動，雖然所有人都係夾硬咁被罰抄校規， 跟住訓導主任改咗條校規，修改漏洞，但係朋友話終有一日訓導主任會覺得太煩而收回校規，呢一件事已經持續咗差唔多成個禮拜。
咁我問佢實際上佢究竟忙緊啲乜嘢，佢就話佢忙緊抄校規，喺呢一個星期裏面啲校規越加越多，佢哋跟住落嚟諗住帶對講機去避過校規，咁我再問佢點解唔真係正式咁樣反對，例如靜坐，罷課或者搞大件事，令訓導主任被迫收回校規，但係我個朋友就突然間就快發火咁樣鬧我，話佢哋個方法終有一日一定會成功，唔使我理， 而且佢哋個反對方式可以將受到懲罰嘅嚴重程度降低， 咁我唔想激嬲我個朋友，就冇繼續同佢拗。
我想問下究竟點樣先至可以畀呢一啲經常性向政權示弱嘅人認清事實，佢哋反抗嘅方式根本就唔會成功，只會令到自己更加退縮，最後退無可退，輸畀政權嘅人？諗住用小聰明去反對，認為政權會覺得煩或者會憐憫佢哋。最後我記得我個朋友讀嘅學校好似係叫香港。