#NSS學校
[GUEST] 想喺度感謝一下老師同埋同學。
講番件事嘅來龍去脈先。我由form 2 嗰年，我個肚就開始痛。當時我都冇乜點理佢，漸漸精神、體力各方面都變差，我平時搭巴士返學嘅，落車之後都要行一段路，對一般正常人都係冇問題，但係我每次行都會攰到想喊。另外，上堂成日都會攰到瞓着（喺度同老師道番個歉）。之後，胃口都差咗，乜嘢都食唔落，一碗飯都差唔多要分兩次食（都未必食得晒），去到後期好多嘢食完都會嘔返出嚟。
去到form 3 嗰年，喺學期頭（大概十月左右）我就入咗醫院，嗰時有啲同學都知道我肚痛，佢哋都會主動打電話嚟問候我，又會想去醫院探我（當時醫院唔畀探病）。咁其實一開始照超音波都冇用都睇唔倒肚入面嘅情況，最後要照CT（個人覺得CT好好玩😂）醫生就話我個肚裏面有個腫瘤要做手術切咗去。最後就經歷咗大約8個鐘嘅手術之後，醫生同我講我有cancer（第三期淋疤）。好快老師同校長都知道，佢哋同埋啲同學都寄咗啲慰問卡畀我。呢段時間亦都開始停課，而我就休學，準備開始化療。化療一共化咗4次。化完雖然可以翻屋企休息，但係我中性白血球好低（越低代表免疫系統越差），所以4次有3次我都因爲發燒要返入厰打抗生素。搞到明明一個星期住院都變至少兩個。父母平日都要返工，所以我一個人喺醫院。住院其實好悶，困喺間病房望著四面牆。你話去散下步又唔係好行得，打機都解唔到悶。所以，就算我休學，我都照上zoom，而老師都照樣畀我上堂，所以我至少可以接觸一吓外面，有得上堂其實冇咁悶（至少可以見到人，聽到人講嘢）。另外，老師喺嗰段時間都會WhatsApp我同埋我爸爸關心吓我問我近況。
最後想喺度感謝番嗰啲老師同埋同學，感謝佢哋喺忙之中抽出時間嚟關心我。