#NSS個人
[GUEST] 我係一個有精神病嘅中五生。抑鬱症，焦慮症，人格分裂，等等。留過班，而家嘅成績係全級墊底。我一直都有個問題，就係好常比較，接受唔到自己。最近我真係忍唔住，日諗夜諗，我好想大家比下意見我。
我自己覺得自己樣貌身材好差。身邊好多人都話其實我唔錯，但我都係成日同其他人比較。成日覺得自己唔夠瘦，個胸唔夠大，腿唔夠長。個樣又唔好睇，次次照鏡都會好自卑。雖然我呢幾個月體重急降，由57KG變到46KG。但我覺得體重唔係全部，要個身型靚先得。係條街見到靚女，會覺得唔開心。我知道我男朋友鍾意睇H漫，又係巨乳控，我又成日同班H漫女主角比較。最近我真係越來越怕，越來越不安。
我成績差，就算我好努力想去學，想去追，都好似無用。比如一題簡單嘅數學MC題目，我都要搞九個字先做到，仲係只係明左一半。睇住同班同學個個成績唔錯，我覺得自己好廢。雖然學校老師同社工成日話「盡左力就得啦，結果唔重要，起碼你有努力嘗試啊」但如努力左都得唔到結果，望下其他人，日日玩，日日出街，都可以攞到唔錯嘅成績。我日日做功課，日日溫書，嘗試追返進度，點解我都係唔得？我又再次同人比較。
我屋企係單親家庭，唔算有錢。我有個細佬，但我阿媽已經幾年無工開，呢幾年完全無收入。因為咁樣，我前排開始去打工，想自己賺自己嘅洗費，但係都係無咩幫助。最近因為屋租太貴，要搵其他地方搬。雖然我唔係我阿媽，但係見到香港嘅樓價，我都覺得阿媽好大壓力。我成日都諗，點解世界唔可以公平少少呢？我再一次同其他食得飽住得安穩嘅人比較。
可能你地會覺得，個個人都唔同，有比較係正常。其實我知，我知有比較係正常。但係我嘅呢種思想已經影響到我生活。我而家做咩都好怕，驚自己做咩都比唔上人地。怕有一日，男朋友會因為我唔夠好離我而去。怕下一年，我DSE考唔好，搞到我唔可以去我想去嘅地方留學。仲有更多，但我都係唔講啦。
大家都試過朝早係度笑，夜晚係度喊嘅感覺。收收埋埋，唔想俾人知，唔想身邊嘅人擔心。所以我先係度投稿，希望你地可以比少少建議我，點先可以令我接受到自己？因為最近我真係好辛苦。幾年前我有自殘同濫藥嘅經歷，本來已經戒左，但呢兩日真係痛苦到忍唔住，再次依賴鎮靜劑，再次界手傷害自己。
如果有人同我經歷緊差唔多嘅野，我希望你地都可以加油。我希望我地可以係呢個Post嘅留言區搵到幫助。
多謝大家睇到呢度。
多謝每一個係下面Comment比意見我嘅人。
多謝Admin幫我Post出去。