#NSS愛情
[guest] hi有啲嘢我唔夠擔當面講，我亦知道知道自己已經再無資格咁講，但係我知你有follow同睇開呢個page,特登計好日子投稿，如無意外你會見到呢篇嘢嘅時候會係我地原本兩周年嗰日，話說個網站呢幾日壞咗，好彩而家整返好，多謝admins
以前成日話，一夠兩年，我地嘅關係就會再進一步。
記得當時你話：俾兩年時間我，如果兩年後我地仲一齊，咁我都可以肯定，我會ready好。
呢個承諾，我一直都有記住，只係，而家嘅我，已經再無資格。
初初嘅我，不停咁諗將來，我地仲話要養狗，連叫咩名都諗埋，不停想像以後嘅生活。
記得當時嘅我仲好迷惘好亂，我話：兩個女仔，其實係咪真係會有將來，其他人會唔會接受我地，承認呢段關係？
我記得，你當時安慰我話：活在當下，點解要在意人地嘅睇法？我同你開心咪得。
我覺得，其實唔係呢，你開心就好，我犧牲少少，無所謂㗎。就好似上年知道你病咗入院，我連書都唔溫走去探你，雖然當年要揀科，但係我無後悔過，你開心就得。
你呀，成日都咁鬼遲先瞓。以前成日陪到你三點幾，搞到我而家雖然無咗你，但係未到三點都瞓唔著。
（打個歌，仲一齊緊嘅時候成日一齊聽：睡到三點 denis kwok 193）
你呢，成日乜都唔同我講，其實我到分手嗰一日都仲未知你幾時離開香港，但係，應承我，過到去唔準咁夜瞓呀，你嘅健康最緊要。
以前以前，成日講以前，但係講完又點。以前我成日為咗喺你起身嘅時候可以即刻收到我嘅一聲回覆「早晨」，我個鬧鐘每五分鐘響一次。不過最後我換嚟啲乜？其實乜都無。好蠢呀可？嗰陣以為咁做，你就唔會離開我，始終都係太天真，而家留得住嘅，只有我嗰個一瞓夠六個鐘就自動起身嘅身體，要擺脫呢個習慣，睇嚟都唔會係一時三刻嘅事。
唉越講越多，你知你一有啲重要嘅考試就會chur足自己一個月。過到去記得唔好chur得自己咁勁啦，一個唔覺意又chur到自己病咗，唔會有第二個我嚟照顧你㗎啦。
係時候放低你了，我知好難，但始終要move on
最後，兩周年快樂，我愛你，保重。