#NSS學業
[GUEST] 路過嘅有時間可唔可以聽下我呻下…可能少長
（第一次投稿，可能講到一舊舊，唔明就算喇，有錯字唔好笑我，知道我係邊個嘅希望可以扮睇唔到）
–
每次測驗考試我都好怕會考得差，於是索性唔溫，考之前都喺度打機，考得差就安慰自己都係因為冇溫到。我知道咁做係逃避緊，但我好似越嚟越差，連聽書都唔聽，然後又俾藉口自己。
–
你哋可能會話我沉迷游戲，但其實叫我唔好打機我係可隨時停嘅，但係我可能會搵咗第二樣野嚟繼續逃避……
–
有陣時會覺得自己好似跌咗落一個無底嘅深淵，淨係見到上面微弱嘅光點越嚟越細，周圍都係黑暗。
（冇咩文采，唔係好識形容，反正係嗰種感覺）
–
自問以前成績其實都算好，但唔知幾時我就開始變到咁……可能係我一直太過自信，覺得想揀嗰科少人揀而且一定入到，所以成績暫時對f.3嘅我嚟講暫都冇咁重要。
–
我覺得我嘅諗法實在太過危險…甚至連我啲屋企人都睇慣咗我個hea樣，有時我真係想喺任何一方面努力下，例如某個星期六朝早想早啲起身練下琴（一般下晝學琴），當我熄咗個鬧鐘冇幾耐，準備出房去廁所刷牙洗面之前嗰刻，透過我間房超級唔隔音嘅牆聽到…
：xxx咁早起身嘅？
：佢話要練琴喎
：佢會咁早起身練琴？/佢唔係不嬲hea開架咩？
句野後面再加個超大聲嘅“嘖嘖嘖”，唔知係我叛逆嘅心態又嚟，我會突然間超唔想做我本來想做嘅野，然後偷偷地喺房到抺眼淚，之後直接返上床瞓。
–
類似嘅對話、事件時不時出現，有時甚至直接喺我面前講。每次
我個心都好唔舒服，但係我從來都反駁唔到，因為我的確係啲咁嘅人，懶懶散散，hea下hea下。然後就不斷循環：冇夠自信，唔敢踏出第一步，唔敢再努力。
–
其實我知道，努力一定會有回報，唔努力一定唔會有回報，大大小小嘅道理我都睇過聽過，我亦都明。但係，我從來都冇嘗試實踐過。我知我自己膽小、懦弱、無知、低能、自大……我好想改但唔知可以點，心態越嚟越差。
–
平時心情唔係會一直唔好，但係好難開心、有活力起嚟，有啲似喪屍,每日行屍走肉咁生活，有諗過結束自己嘅生命，但我知道死唔係解決方法，我亦都有自己鍾意嘅野、想守護嘅野，亦都唔係好捨得去咁做，我只可以繼續向前。
–
你哋話我仲有冇得救？有咩可以幫到自己……覺得好似越踩越深…
（投稿於17/4 02：30）