Guest

#NSS個人

[Guest] 朋友真係離我咁遠?
(長文慎入)
大家好,呢邊第一次投稿,如果表達得差希望能夠見諒.
講一講背景先,我小學2至4年班都同好朋友好friend,好close,但係到5年班開始因為同佢哋唔同咗班就被自己班同學排濟,加上嗰陣追星熱潮,我完全無興趣,搞到連新識嘅朋友嘅距離都疏遠咗,我有嘗試接觸韓星,但係真係起唔到興趣,最後連朋友都無埋,呢件事一直持續到6年班,因為係成班直升所以冇機會同以前嘅朋友一班,變相被佢哋欺凌,我嗰陣時仲唔開心到剃咗自己條眉,直到畢業都無朋友陪伴,對”朋友”都無曬期望.
到咗中學,因為小學太大陰影,所以都唔太敢同自己班同學交流,開學嗰陣,有個女仔坐係我隔離,佢好無精神,日日上堂訓覺,老師叫完佢起身之後佢又再訓都唔太再理佢,後尾因為坐隔離加上同社嘅關係,慢慢傾到計,雖然中間都有啲拗撬,但係最後我哋都成為咗好朋友,我知道佢細過阿媽因病過咗生,佢一直都有接受心理輔導,所以我一直都好照顧佢,佢份人咩都冇所謂咁,成日做唔到決定,呢一樣嘢令到我好困擾,問佢鍾意咩佢都話冇所謂,二揀一都話唔知是但,連老師問佢得唔得閒佢都望住我好似唔知點好,所以次次都係我幫佢答.
到今年中二,因為我哋分咗班,所以平時小息都講下上堂趣事,佢中一開始已經成日唔做功課到今年都無變,同埋分咗班,佢嗰班啲老師又唔太點講書,雖然我哋兩班都係普通班,但係我同佢相反,我嗰班啲老師中英數都係我嗰級嘅班主任,教書教得勁好,好詳盡,所以進度係正常,佢個班功課進度快我嗰班成倍,我想幫佢都幫唔到.之後除咗考試同對卷之外一直上Zoom,無點見佢,佢阿爸上年十一月都因病過咗生,我有安慰佢,但佢都係話自己無野,同佢傾電話都聽到佢唔太在乎,直到啱啱考試先見返佢,佢喺我考完第一份卷嗰小息同我講佢下年會開始去英國寄宿學校讀書,自佢阿爸走咗之後因為佢姑媽嫌佢脾氣臭佢就喺佢姨姨到住,雖然佢姨姨無所謂,但係佢爸爸走咗一個星期都無佢姨姨就話佢無理由一世都喺佢到住,所以就扔佢去英國寄宿喎,仲話要佢自我獨立,我聽完第一覺得”吓,有無搞錯,佢雙親身亡,已經好慘,依家仲要扔佢走,仲要佢自立wtf”第二我完全無諗過第一日考試就比啲咁嘅消息我聽咁突然,同埋無諗過佢會無端端要去英國離開我.佢自己就話原先想大學先去外國,但係又同我講自己無所謂又想去,所以我都唔知佢想點,我問佢佢會唔會唔捨得,又話淨係唔捨得我,我再問佢佢可唔可以為咗我唔好走,佢又話唔得,我話如果係我,我會因為佢而留喺香港,但係佢都唔理無回覆,我知我可能好自私,但係另一方面去諗佢,佢呢個時候真係唔太適合去,佢英文喺非常差嗰隻,去到嗰邊難溝通不得只,仲要無人無物照顧佢,我同佢講可唔可以同佢姨姨講遲啲先去,唔駛咁早,佢姨姨同佢講話可以同我視像,又話為咗佢將來唔好作犧牲,仲話叫佢唔使再同我講,我真係黑人問號.
我有諗過如果佢真係要走,出年又會得返我一個,我啲回憶開始浮現,好似重蹈覆轍返小學嘅時候,最好嘅朋友再一次離開我,我真係好唔開心,返到屋企喊咗成晚,連考試都無心機繼續温書,點解只係隔咗一年,同一事件又發生喺我身上,連”朋友”咁簡單我都唔值得擁有？唔通”朋友”真係同我無緣？