#NSS家庭
[GUEST]
話說呢幾個月屋企日日都嘈到拆天，啱啱又係咁，所以就打呢篇嘢嚟發洩下。
大概半年前(？或者九個月前，工人姐姐突然有啲事返左印尼，咁啱請唔到新嘅，而6月嗰陣嫲嫲又走左，媽咪見我同細佬都已經大個左照顧到自己就冇諗住請個新嘅，所以而家家務都係由媽咪嚟做，當然我哋都有幫手分擔下，但係由細到大一直有工人姐姐照顧，好多嘢都唔係好識，有時可能仲越幫越忙，搞到媽咪成日都好嬲..
媽咪一至六都要返工，份工好唔定時，有時早有時夜，之前可能到我哋瞓左(大概12點幾)都未返到屋企，而家叫做好啲通常都10點半前返到，但係因為工時長返到嚟又要做家務做到好燥，所以我、細佬同爸爸都做左佢嘅出氣筒。
我哋都明白佢真係好辛苦，但係成日都鬧鬧鬧，乜都鬧一餐鬧到隔離鄰舍都聽到哂，講嘅嘢又好過分…
成日話我同細佬白痴冇用乜都唔識，書又讀唔好真係唔知生嚟做乜等等好hurt嘅說話，呢排我自己嘅情緒都幾唔穩定，成日一個匿埋喺廁所喊，有時嬲得滯會打或者踢啲嘢發洩，再唔係就用指甲或者其他嘢拮自己手腳，其實有時真係會諗點解自己咁冇用乜都唔識，想結束自己生命，但係自己份人又細膽，根本做唔出呢啲嘢。。
媽咪佢唔止鬧我同細佬，有時連爸爸都鬧埋一份，例如拖拖下地無啦啦話爸爸返到嚟淨係識得攤喺度，但其實佢返工都超辛苦，做嘢做到手痛腳痛腰痛，成日都整傷，爸爸通常都會唔出聲，有時候真係頂唔順就會好大聲咁鬧返轉頭，呢啲情況雖然好少發生，但如果真係咁嘅話事後成個屋企就會好靜好尷尬，完全冇人出聲。
亦因為咁爸爸媽咪最近嘅關係變得差左，成日為錢而嘈，有時真係好驚佢哋會離婚…我知佢哋為左頭家應該唔會咁做，但係佢兩個畢竟係因為有左bb先至會結婚，所以好多嘢我都好擔心。。
身邊有唔少朋友嘅父母都離左婚，同後母/後父一齊生活，關係都唔多好，我真係唔想屋企變到咁…
我知我已經幸福過好多人，其實爸爸媽咪對我同細佬都好好，只不過有時真係會頂唔順😷
多謝睇到呢度嘅大家，希望各位嘅屋企都和和氣氣，幸福美滿🤍
thanks admin🙇🏻♀️