#NSS個人
[Guest] 我依家讀緊大二，自從考DSE嗰年，我嘅睡眠質素越嚟越差。中學嘅時候我可以11點幾就瞓，但依家唔到兩點之後都唔會瞓得著。我本身屬於容易緊張嘅類型，唔鐘意瞓覺嘅時候聽到人為嘅聲音，就好似細細聲講嘢嘅氣音，或者係屋企人未瞓佢地做緊某啲嘢發出嘅聲音。
我有個好鐘意夜晚12點幾先返屋企嘅家姐，因為我冇自己嘅房，所以佢返到嚟整緊啲乜嘢，甚至係沖涼嘅花灑聲、沖完涼護理皮膚搽cream、吹頭嘅風筒聲，我都聽得一清二楚。而佢就沖涼沖至少半個鐘，由做哂皮膚護理之類嘅嘢到吹完頭又至少半個鐘，拜佢所賜我完全瞓唔著，可以話佢唔瞓我都唔使瞓。而我聽到呢啲煩人嘅聲音會變得緊張，心跳都會快咗，而最近我就開始穩定11點幾接近12點莫名緊張起嚟，如果佢去到接近1點都仲未返到屋企，我嘅緊張程度就會增加，嗰種感覺超唔舒服，個心好似跳得唔正常，而且明明我眼瞓都唔會瞓到。
為咗解決我瞓唔著嘅問題，我有試過喺佢返到屋企之前就上床。但呢個方法其實係虐待緊自己。我會因為佢仲未返而變得緊張，自然唔會瞓得著，然後我就可以享受喺床上心跳跳得好快，點換姿勢都唔會舒緩，明明有睡意，差唔多就快瞓著都會緊張醒，直到佢返到屋企。但因為佢真係好黑人憎，返到屋企就會重複我上面提過嘅一系列嘈音，所以冇咁緊張又會緊張返，直到佢肯瞓為止。到依家我已經放棄咗早瞓，每日都1點幾上床，所以喺床度會失眠到至少兩點幾，最高紀錄係3點都未入睡。
因為佢我已經有一年冇試過12點前瞓，但好彩依家仲係online lesson 所以我唔需要早起身，而且唔使返campus 我都會有時間可以下晝補下眠。而精彩嘅係，我就連補眠都會心跳加速，1個鐘可以醒兩三次，每次醒咗都會覺得個心跳得好快，所以無論日間定夜晚我都唔會瞓得好。
我覺得我咁樣瞓返應該會好短命，但又冇改善方法，我依家夜晚1點幾打緊呢篇文，都係因為我瞓唔著。唔知大家又係咪失眠呢？