#NSS家庭
[GUEST] 唔知大家會唔會同我一樣，好驚自己屋企人會突然離開呢個世界。
其實又唔可以話突然嘅，我嫲嫲已經八十幾歲，我喺幾年前開始就成日開始驚佢會某一日就唔喺度，唔知係咪因為爺爺婆婆都喺我1歲前走咗，公公就係我5歲嗰陣走咗，所以我更加珍惜我嫲嫲。我公公唔喺度嗰陣我記得我喊咗差唔多成個月，我完全想像唔到如果我嫲嫲走咗我會點，累積多咁多年嘅感情一定有一定影響，同埋其實我嫲嫲真係好錫好錫我，因為疫情關係我見少咗佢好多，所以我成日都好掛住佢。有一次我屋企約咗同佢飲茶，但係我地喺酒樓等極佢都未嚟，打電話又無人應，我已經好驚，之後我爸爸直接上屋企搵佢，喺酒樓等嗰陣我隻眼浪住晒啲淚水，真係好驚好驚，好彩最後無事，之後諗返我都唔知點解自己可以驚到咁。同埋其實我嫲嫲聽力好差(一隻耳聾，一隻耳靠耳機有大約5成)，所以硬係覺得好無安全感，成日打電話俾佢佢都聽唔到。同埋想講下我每次去探佢之後要走同佢say bye嗰陣，我都會做好心理準備嗰次係最後一次見佢，我都唔知點解我會有咁嘅想法，可能覺得我做好心理準備到時唔會咁傷心？我都唔知…
Sorry好似上面好似講極都去唔到重點咁。咁點解我會突然想投稿呢，話說我嫲嫲前排整親入咗醫院，要做手術，而家做緊復康治療。佢整親嗰日我爸爸收到電話嗰陣我都喺隔離，我見到我爸爸嘅反應嗰陣，我已經心諗係咪呢一日終於要面對… 不過知道咗唔係之後我第一時間諗嘅嘢竟然係：呢個都算不幸中之大幸。但其實我嫲嫲嘅傷都算少嚴重。Anyway我嗰一日唔知點解我其實無咩特別心情嘅，但係我嫲嫲入院嗰日係年廿七/八？跟住年三十，年初一嗰陣返去過年無咗佢真係突然覺得好空虛，特別係而家醫院唔可以去探，只可以靠facetime同佢講一講嘢，真係少唔慣。Facetime嗰陣其實我都見到我嫲嫲個樣好唔開心，講嘢嘅語氣都好失望，同埋佢好似覺得麻煩咗我地，係咁話我地唔使送啲日常用品同埋煲湯俾佢，我真係覺得佢好可憐。雖然我知道呢啲係正常老人家心態，但都突然覺得…我唔係好知點講但係大概係好驚佢就咁喺醫院度走咗？可能特別疫情關係啦，真係突然覺得生命好脆弱。我自己本身比較內向唔係好識表達情感，我爸爸見到我對嫲嫲件事好似唔係幾理咁，就問我點解唔關心嫲嫲。佢問我嗰陣我隻眼啲淚水已經想流出嚟，不過我忍住扮無事發生。
講多次sorry我都唔知我自己成篇嘢嘅重點喺邊…不過想講吓我嫲嫲而家嘅情況，佢做緊復康治療算行到幾步咁，但基本上仲未自理到，隻腳仲痛緊。但係啲護士係咁叫佢出院，但我地屋企根本無人可以有時間照顧佢，佢連行去廁所都行唔到啦，想問吓點出院？物理治療師啲治療都未做完就出院？其實我嫲嫲而家喺明愛醫院(已經少自爆希望認到我嘅話唔好相認🥲)，咁大家都知明愛醫院出面成堆中咗武肺嘅老人家要瞓街，所以啲護士就希望我嫲嫲快啲出院咁就多一張病床。我都明白而家醫院超晒負荷，咁唔通就係因為垃圾政府搞到醫療物質嚴重短缺所以要啲情況都根本未可以出院嘅病人出院？問題係啲護士一日到黑係咁說服我嫲嫲出院，咁我嫲嫲的確好想出院，但係種種因素都唔可以容許佢出院啦… 呢樣嘢真係搞到我地全家好頭痕，全日都喺度驚啲護士會唔會俾嘢我嫲嫲簽出院，跟住我嫲嫲就唔知咩事懵吓懵吓就簽咗…
Sorry打咗成篇長文我都唔知自己究竟表達緊啲
乜… 總括嚟講就係我好怕失去我嫲嫲。我投稿唔係話要大家幫我解決問題，只係純粹分享吓(? 如果我有打錯字或者表達方式嗰啲有錯嘅話希望大家唔好屌同埋擺錯重點…小妹盡力了🥲
Sorry for 1999
希望admin如果見到就po上ig啦thanks so much🙏🏻