#NSS家庭
[GUEST] 我係一個form2嘅女仔，我同我爸爸嘅感情從細到大一向都好好，看似係冇輩份關係嘅朋友一樣咁。佢一直以嚟都好寵我，成日會錫我塊面，但係誇張啲嘅話，佢亦都會成日摸或者錫我嘅大腿、頸、耳仔、腰部，甚至係臀部（全部都係冇衣物隔住嗰種），再誇張啲，有段時間佢仲會舐我塊面。我細個嗰陣覺得呢啲淨係屋企人之間關係好嘅互動，但係越大個就覺得越唔舒服，雖然由細到大佢都係咁樣對我，但我而家已經踏入青春期，就算佢係我爸爸，對我做呢啲動作都會令我感到好不適。
我開始喺佢同我互動嘅時候感到抗拒，亦都會做啲反抗嘅動作，但係佢都不以為然，無論我有幾大聲拒絕，表現出有幾咁唔情願都好，佢都會當呢啲互動係一個日常玩笑，唔會收手。我曾經都好認真咁同佢講過「我唔鍾意咁樣。」當然講咗佢都唔會聽，完全係嘥氣。
屋企入面除咗我同我爸爸，淨係得婆婆，同婆婆生活咗咁耐，佢一直以嚟都好清楚爸爸平時會對我做啲咩，我曾經向婆婆求救過，但婆婆都只係笑笑口，單純覺得爸爸呢啲只不過係太過錫我嘅表現，話我細細個諗太多，冇人了解我真心嘅諗法。
直到如今，爸爸依然冇變過，我對佢呢種行為嘅感覺已經唔單止係唔舒服，甚至係覺得非常嘔心，我已經唔知點算好，但係我覺得我唔可以就咁坐以待斃，所以我想徵求呢度各位嘅意見，請問我可以點做好？