GUEST

#NSS社會

[GUEST] 最近見到有好多人就政治嘅議題投稿。咁我都忍唔住加幾句。事先sor for 1999，加翻句長文慎入先下。

一，咩係無立場？
生於香港呢個社會入面，面對黃藍之分，唔少人會選擇企埋一邊。而其中選擇兩者之外嘅，一係就中立，一係就無立場。但係一個人要冇立場，其實好難。我地係屬於呢個世界嘅人，每日都處理，思考，面對呢個世界嘅事物。要講我地對呢個世界毫無意見，心入面毫無想法，呢個係冇可能嘅。見到一個又一個嘅雲端中人，政府高層，各位議員，因為一個生日會全部去晒竹篙灣，試問會有人仍然覺得佢地無可指摘？試問會有人仍然認為佢地係對香港最好嘅領導人？就算係藍絲，心入面都一定有個結論，只係唔知佢地肯唔肯去面對，去處理。每個人心入面都有一把秤，正所謂公道自在人心，唔係就係呢個道理？所以，結論就係：呢一班所謂無立場嘅人，對於黃藍兩大陣營，都揀唔落手，或者基於某啲矛盾嘅價值觀，落唔到一個結論。
中立就擺到明揀唔落，所以多年黎，中立甚至被定性為一種罪。天主教入面彼拉多係一個罪人，就係因為佢冇就耶穌嘅判決表示立場，喺人命關天嘅時候選擇中立。二戰期間，德國人一旦中立，可能會引來殺身之禍。前蘇聯甚至唔容許藝術發展/較為自由嘅思想，唔允許任何存在嘅第二個立場，冇中立/立場可言。（例子可能唔係咁好，但其實有好多。）我地可能亦都講中立嘅人比作彼拉多，喺多宗嚴重傷人，甚至係關係到人命嘅事件之中，似乎冇打動佢地加入其中一邊立場。但係，一個人嘅表態，係咪就係佢嘅一切？我地會唔會忽略左佢當時嘅情況，太急於比佢一個判決？宜家好多人就係因為立場上嘅唔同起爭執，廢青廢老之爭喺無數個家庭中浮現。其實我地如果想改變社會，想解決撕裂，淨係有一邊贏係唔得嘅。2021，藍絲明顯贏左啦，社會有改善到咩？換個諗法，假如有一日，我地煲底相見，我地又係付出左啲咩代價？我地靠住不斷嘅摧毀，到最後，又建設到啲咩？
咩係無立場？講左咁耐，其實無立場都係一種立場。無立場，係一個對自由最後嘅表態，因為真正嘅自由，可以選擇黃，可以選擇藍，更可以選擇好多其他唔同嘅選擇，包括中立同埋無立場。甚至佢地唔需要選擇，社會都唔會對佢地有所指責。

二，黃=支持民主自由，藍=愛黨愛國？
小妹係相信人應該有自由。人生在世，僅此一次。我地要行點嘅路，有啲咩選擇，有啲咩決定，都係我地一個人承擔。所以，我地對自己嘅人生應該有自主，喺所在嘅社會應該有呢個自由。民主，就係社會入面嘅人，佢地對一個重大嘅決定嘅一次討論。呢個討論，講到尾，小數服從多數，如果你係小數，就要心服口服跟大隊。民主係為左大眾利益，為左有更多人可以表態，令呢啲小數嘅意見即使最後冇被接納，佢地嘅聲音亦都可以比其他人聽到，從而引起大眾嘅深思，引起大眾嘅關注。咁樣，先至係小妹心目中嘅民主。
但係黃絲們，你地又真係實行得到民主？一系列嘅杯葛、分類、批鬥、襲擊、起底，你地私了嘅人，何罪之有？就係立場。佢地嘅立場係佢地嘅罪。我唔排除有一啲大奸大惡嘅藍絲（先不論最高層嘅太太，何君堯呢個名，打出黎都覺得污染緊自己嘅螢幕），但係真係可以一竹篙打一船人咩？你地都識講，黃絲之中，真係激進嘅人其實唔多。同樣道理，極端嘅藍絲有幾多個？
而你地對內地人嘅不滿，就係好多人成為藍絲嘅原因。內地人民，只有少數係小粉紅玻璃心。唔通一個人喺邊度出世係有得揀？你估佢地14億人真係全部都想喺嗰邊出世？點解呢班受害者仍然要比你地歧視、鄙視？佢地唔了解，情有可原。但如果佢地了解，甚至支持，你地仍然有一啲人，唔理三七廿一，繼續你地嘅罵戰？
正如有個樓主所講（唔記得邊個sor），黃藍嘅政治光譜中嘅兩端，兩個同立場嘅人背後信念可以好唔同。以一個立場統稱佢地，以一個立場將佢地定性、定型，釘死佢地，對佢地，對我地，唔公道。

講住咁多先。真係有好多嘢忍左好耐。小妹唔係冇立場，亦唔係想繼續分化。只係想打醒某啲人。我希望時至今日，我嘅一聲吶喊，仍然有回音。