#NSS個人
[ 呢篇唔算長啦，我仲有好多嘢想講]
點算？我仲係會成日諗起你，但我哋兩個好似一早已經冇晒瓜葛。琴晚我夢見倒你，但係夢裏面係咩內容，我一早已經唔記得，真係唔記得咗，我諗之後我應該都會不知不覺咁樣忘記你。今日原本諗住sendmessage俾你，講類似於新年快樂之類嘅嘢，但係諗吓諗吓，都係唔好啦。
我一直都係咁諗㗎: 放棄鍾意一個人有講唔完嘅遺憾，但係時間可以將我嘅感情分薄，然後佢可以將一切嘅遺憾沖刷開去。二如果我唔放手，一旦你唔鍾意咁樣嘅我，我同你曾經嘅回憶都會變成你嘅惡夢，我哋會怨恨對方。如果你唔憎咁樣嘅我，我哋會一齊行過某一段日子，然後有一日，你會厭倦我或者我會厭倦你，又或者有家人、外界嘅干涉，我哋最終都係會分開㗎…而喺好多年之後嘅同學會，我又會以一個點樣嘅身份去面對你呢？係同學固有前度定係陌生人？再之後，如果你遇到一個比我更加愛你嘅男人，或者我遇到一個愛我嘅人，只係因為佢哋係一個男人，你或者我，會同各自嘅佢攜手走入禮堂，生兒育女。而係之後我哋又點樣同佢哋每一個解釋我哋嘅過去呢？
我唔係體貼，我唔係諗得周到，我只不過係好細膽， 我唔夠膽面對呢個世界面對你同面對自己嘅內心。
成日聽人講話喺呢個世代，大家嘅思想開始變得冇咁封閉，不斷有唔同嘅法律去保障唔同性向嘅人，又有人話BL同埋GL嘅出現係為咗去幫同性戀、雙性戀「去污名化」。但呢啲係真嘅咩？
事實上，只不過係商人睇中咗市場嘅需求，特登賣腐，大家睇中嘅其實係顏值，同嗰啲令人興奮、滿足嘅瞬間，而唔係佢背後嘅意義…
以前我見到你笑嘅時候，我就可以精神一日，而喺你離棄我嘅嗰一段日子裏面，我好似每日都覺得好沮喪。我以為你走咗之後，我可以重拾心情，然之後重新振作，因為我唔使再睇住你同人哋卿卿我我，我可以專注返自己嘅生活。但係你走咗之後我嘅狀態竟然係一落千丈，我望住你班房嘅空位，我覺得：呀，你已經唔喺度啦？之後每當班房門打開，我都唔使再抬起頭，望係邊個入咗嚟；紅色小巴經過嘅時候我都唔會睇入裏面，球場我都冇再望啦…朝頭早訓練嘅時候，7點25分，我唔會再望向走廊睇吓你返嚟未，會唔會望吓我。我嘅生活靜咗好多，又頹廢咗好多，好似人生好似冇咗目標咁，個心都好空。
我哋會再見嗎？一個係澳洲，一個喺歐洲？
我會掛住你㗎，你會掛住我嗎？
唔知自己點解要咁做，但係我想承諾一下如果後來我有能力照顧好自己，有能力支撐起自己生活，有能力去保護自己身邊嘅人，當我足夠強大時候，我想嚟搵你，第一切都隨你意願，我只不過係想再來一個守護者嘅角色去愛一個人。
另外我想講嘅係，我認真好多謝，好多謝，某年某月有人同我寫咗一篇我鍾意嘅故仔，結果下一個月嘅第二日我就知道佢要走，喺製作嗰篇故仔嘅嗰段時間，佢亦都同我坦白左，接下來嗰段時間，原本唔係好close嘅兩個人，日日黐埋一齊，佢請我食早餐，佢同我一齊打機，運動會嘅時候我哋拖過手，佢同我睇鬼片，佢連續寫咗好多年信俾佢嘅之後，佢寫咗唯一一封信俾我，你嗰張卡封面上嘅一句話，我永遠都冇辦法忘記。
沉船的我，一早就已經冇救㗎啦。其實我都知道自己係一廂情願嘅，但係我唔捨得放低啊….
我究竟係應該放棄自己嘅想法，定係以佢作為一個信念去繼續我嘅人生呢？
圖Link: https://ibb.co/w7cbb3q