#NSS愛情
[Guest] 長文慎入👀
大家好～小妹第一次投稿，可能有少少1999，請見諒🙈
交代一下背景先～
我今年18，亦都係今屆dse～而男朋友今年19，一齊左差唔多三個月左右，依家感情都好穩定。
.
我依家讀緊既學校係band1a，唔煙唔酒，成績中上，想入八大，平時有整開甜品同埋打羽毛球既喜好，鋼琴考到8級；而男朋友讀緊high-dip，雖然佢靠dse前幾個月發奮，最後都讀到high dip，但其實佢對讀書好反感，喺讀書方面完全被動，而佢因為之前既經歷，例如喺中學比人bully，所以冇乜信得過既朋友，之前有返part-time，依家佢就搵緊工。佢都將我哋比喻為大雄同靜香，佢話佢似冇運動細胞，成績差又懶惰既大雄；佢亦都話我似成績同運動唔錯，又識整甜品同彈鋼琴既靜香。
.
我哋喺交友app識，一開頭我哋都係晚晚傾電話同埋message而了解下對方，本身一開始我對佢都未算好有feel，反而佢就好主動，識左差唔多一個禮拜就認定左我，覺得我好細心，善解人意，成績又好，唔任性，又孝順，係一個好女仔。但可能因為識左唔算好耐，所以我嗰陣暫時對佢有保留，直至了解多左大家，我就開始對佢有feel，但心入面都唔係好肯定係咪真係鍾意佢。
.
喺第一次見面前一晚，佢就再一次同我表白，而我就話比一晚時間我，另一日講個答案比佢聽。去到另一日，即係正式見面嗰日，佢就一如既往咁主動，又溫柔細心，我就怕怕醜醜咁。同一般情侶一樣，都係拖下手攬下對方咁，然後我哋去左海旁行下傾吓計咁，之後佢隔住口罩錫左我幾啖，我第一時間就係唔識反應，但反而我冇避開佢，同時佢平時對我又溫柔，為我著想，好貼心，又專一同埋唔蒲。佢之前有食煙既習慣，亦都肯為左我而戒煙，都係一個好男仔。嗰陣心入面好似覺得對佢既感覺升溫左，真係confirm左我係真係鍾意佢。
.
去到依家，我哋甚少鬧交，就算每次鬧交都喺10分鐘內和好，佢都好主動咁比我check電話，證明自己已經del左交友app同埋冇同其他女仔有親密關係。但因為我覺得每個人都有私隱，所以我就好客氣咁同佢講話唔使，不過我知道佢想我放心，所以最後我都順佢意，check下電話就算。而佢知道我鍾意鬼滅同mha呢兩套動漫，有時佢會偷偷地買figures送比我，雖然好開心，但係始終比既都係佢啲錢，我又唔捨得佢晒錢，所以我有勸過佢話唔使買咁多嘢比我，佢就話男朋友比錢係應該既，我為左aa，有時同佢食飯同埋買嘢，我會主動比返錢🙈而每次出街，都係佢主動搭巴士過嚟搵我出街，之後都會不顧一切送我返屋企，真係覺得佢好好，同時同佢行街拍拖又拍得開心。
.
喺我同佢屋企人方面，我屋企管得比較嚴，雖然屋企人唔反對我拍拖，但係佢哋以唔影響學業為由，我都唔反對佢哋既觀點，同時阿媽唔會比我出夜街，會覺得我拍拖之餘，都要focus學業；相反男朋友屋企人比較寬鬆，就算食煙飲酒同埋出夜街都冇問題，但最緊要係生性。加上男朋友真係好愛我，好錫我，好珍惜我，對感情專一，雖然一齊唔算好耐，但我都已經認定左佢。上個禮拜男朋友邀請我去佢屋企同auntie uncle食晚飯，期間我哋都有傾有笑，而auntie同uncle都話好鍾意我，同佢地毫無爭執，亦都好放心同我講希望好好睇住男朋友，支持佢搵工，嗰陣既我霎時覺得有種歸屬感，男朋友都笑住話未來佢阿爸阿媽有我呢個好新抱，依家佢都有個好女朋友甚至未來老婆，我聽到之後真係好感動，佢阿爸阿媽又當我半個女咁錫，真係好開心。
.
呢幾個月入面，我都間唔中去佢屋企食飯，睇戲，上堂同埋溫書，而性呢方面都ok，有戴套既，有時我或者佢未必想要，我哋都尊重大家唔做住。同時男朋友都知道我要dse，所以佢都一直喺我身邊陪住我，支持我，開心就一齊笑，唔開心就一齊喊，而佢都買左屬於我哋兩個既定情信物，例如戒指，手帶，音樂盒等等，象徵住我哋兩個，眼中只有大家，雖然呢啲定情信物好普遍，但係對我哋兩個嚟講何等重要，當佢哋係寶咁珍惜。
.
與此同時，男朋友同我都好眼淺，即係好容易喊嗰種，但係可能因為男朋友由細到大都係喊包feel，有時我唔覺意鬧佢幾句，佢就會喊住求我唔好嬲，加上佢之前有抑鬱，有幾次我哋行行下街，佢喺街度喊到收唔到聲，我二話不說即刻攬緊佢，輕輕摸下佢個頭，安慰佢，佢都攬我攬得好實，好怕我離開佢咁😢每次我見佢喊到好淒涼，唔忍心見佢咁心痛嗰陣，我都會好心軟咁即刻攬住佢，大家抱頭痛哭，加上男朋友之前拍嗰兩次拖，兩次都受過傷，而屋企方面，佢同佢阿爸借過財仔，阿媽為左幫佢還款，兩母子都好大壓力，男朋友有時覺得自己好冇用，之後亦都應承我唔再借，所以做女朋友既我，都應該要好好愛錫佢，保護佢，唔比佢再受傷。
.
可能因為我哋太掛住對方，所以上個禮拜期間，日日都去佢屋企上堂溫書，但係因為阿媽平時唔比我出街，想我留喺屋企專心溫書，所以每次我都話返學校做嘢為由出街，但其實係偷偷地去搵男朋友。可惜紙包唔住火，最後都係比佢識穿左我同男朋友拍拖行街，而唔係返學校做嘢。一嚟講大話，令到阿媽好嬲，二嚟佢對我男朋友有唔好印象，以為佢教唆我講大話，係咁話我識左個壞人，我一聽到真係好嬲，先係同阿媽道歉，其次係嬲佢咁話我男朋友，因為我搵佢係我自願，唔係我男朋友逼我，更何況我冇因為男朋友而唔溫書或者唔上堂，啲功課交齊。加上男朋友既出現，係我努力考好dse既動力，又愛我，錫我，珍惜我。去到依家，阿媽都見到佢對我既好，開始對我男朋友都幾好，但係阿媽都唔想我為左佢成日出街，避免我又講大話偷偷地出街，咁唯有呢段時間就下阿媽唔出街，同男朋友日日facetime，遲啲再出嚟見咯～
.
去到依家，我哋都係相親相愛，我好愛惜你，而你都好愛惜我，雖然我哋仲細，冇乜資格談婚論嫁，但係我相信，我哋兩個可以一直走到世界盡頭，無論其他人點睇你，我依然好好愛惜你。多謝你出現喺我既人生中，我愛你❤