唔知點講，咁多年我都係放唔低佢，好似呢世都愛到其他人咁。
平均暗戀一個人會過幾耐先會心淡？3個月？半年？一年？我暗戀左佢足足五年。
可能有啲人覺得，五年姐，有啲人暗戀左十幾廿年都未出聲。但係，五年近乎等於成個中學生涯，一個人生最重要嘅階段，直到依家都未曾停止過。
我同佢玩得好埋，見到就會一齊攬黎攬去，日日傾計傾唔停，都係多謝我係一個女仔；同時，亦都因為自己係女仔而無奈。有時會諗，如果我係一個男仔，會唔會就有機會？嬉笑怒罵中講嘅我愛你、我鐘意你，其實每一句都發自內心，不過比大家好詼諧咁帶過左。
我仲記得有次，我話你去grad trip嗰陣屋企人會掛住你，你問我「你講你呀？」我呆左，然後自己係度傻笑，個一秒連我地第時個仔叫咩名都諗埋。我答你「係呀」然後加啲emoji，令睇落去冇咁令人懷疑。然後大家笑下笑下就去左第二個話題。
唔知嗰刻，你知唔知我鐘意你呢？
又一次，你去同朋友慶祝生日，我內心百感交集，一方面見到你咁開心又鄧你開心，另一方面又諗緊，你會唔會有機會同我慶祝生日呢？ 然後自己又打消左呢個念頭，始終我同你現實中都只係學會活動一齊玩。
你好靚，好可愛，成日有狗公搞你，每次問我點算點拒絕，我都會叫你block左佢。然後跟住你話：「咦我都未block佢已經unfollow左我。」我就會笑你：「可能眼花睇錯女掛」
其實係後面，我直接屌鳩條狗公，自問自己鬧人都有一手，鬧到啲狗公落花流水。可能啲狗公怕左我，或者覺得我煩啦，佢地通常都會乖乖地unfol你。
如果你知，你會唔會知我鐘意你呢？
每次你同我講今日發生咩事，學校發生咩事，我都會甜笑望住部電話。我記得你有次同我傾計，我搭緊8號，隔離個阿姐問我：「阿妹，拍拖呀，笑到咁。」我好想同佢講我係，但係最後都只係同佢講：「冇呀，好好笑姐。」但係嗰陣你只係同我講緊你今日碗拉麵好好食。我笑唔係因為內容，純粹因為講嗰個係你。你把口講嘅嘢就算幾無聊幾廢都好，對我黎講就好似福音、聖經咁，治癒我心靈，然後就不自覺咁係度傻笑，成個傻佬咁。
如果坐我隔離嗰個係你，你會唔會知我鐘意你呢？
我成績原本好差，唔鍾意讀書。你話：「你考到medic我就同你出去慶祝！」個下，我個心好熱，嗰一刻我好似搵到自己人生目標咁。於是，我cut左學左好耐嘅鋼琴堂，delete曬電腦同ps4啲game，全部時間係咁讀書。唔知幾多次我做數做到喊，唔知幾多次我望住堆範文幾想撕爛啲notes，唔知幾多次想放棄。但係因為你呢句「考到medic就一齊出去慶祝」我亦都唔知幾多次攞返起支筆，就算喊住都要做好啲嘢。結果，我成績突飛猛進，一年後，學校predict我已經夠medic門檻，連屋企人同埋個堆睇唔起我嘅老師都嚇親。問我點解突然間考得咁好，我都唔會出聲，笑下就算。因為我唔想浪費唇舌同佢地講野，淨係想同你講：「多謝。」我冇同你講我成績已經冇之前咁差，只係想你可以keep住幫我溫書，話我「又唔記得『鬻』字解咩，腦退化呀！」其實呢啲我一早就記得，仲記得蘇軾話你同周瑜一齊添。
如果你知我咁努力，會唔會知我鍾意你呢？
我最記得就係，嗰日你啲朋友打電話比我，話你入左醫院，嗰陣我上緊堂。我呆左，然後冇出聲就自己執嘢，咩書包衝左出門口。啲朋友問我咩事，我冇講野，我唔敢講野，我驚一開口我就忍唔到啲眼淚。老師叫我企係度，話我依家係曠課。我淨係望住佢，強忍淚水開口話：「你要記就記飽佢。」然後就衝左出課室，跑出校門。
我出左校門之後我call左架的士，比多一舊水叫司機渣快啲。司機好比面我（或者係啲錢），一首歌嘅路程就到左醫院。我照住你啲朋友send比我嘅房號樓層，一去到就見到你訓左係度。「佢話佢想見你。」你朋友話。之後圍住你張床嘅人好快就走晒，得返我同你。你講左好多，好似你平時咁講唔停口。但係同平時唔同嘅係，你講兩句就上氣唔接下氣。
我冇講野，淨係苦笑住問你：「做咩一早唔同我講吖衰鬼。」你話：「你要考dse啦，邊好意思姐。」
好賤，你直到呢刻都係咁得意。
我冇講野，只係烏低身攬住你，好似好耐之前係學校咁。同之前唔同嘅係，今次攬住你唔係因為贏比賽，而係因為你準備長眠。
我唔敢喊，我唔敢喊，但係都忍唔住抽搐。你攬返住我，好暖、好香、好軟。啲頭髮好順，個身好瘦。
之前點解會冇留意到嘅？
然後我慢慢放低返你，比你訓返係床度，你笑住望住我，好可愛、好可愛、好可愛。
「下次我會同你去慶祝㗎啦學霸。」你咁講。
然後，我播返你最鍾意嗰首powfu嘅death bed。
係首歌完嘅時候，你都走左。最後，我都係忍唔住喊左出黎，就咁趴係你張床度，係咁喊，喊左好耐，連啲姑娘都遞紙巾比我。
唔知到最後，你知唔知我鍾意你呢？
–