#NSS個人
[GUEST] 唔知幾時開始，我習慣壓抑情緒
人究竟係咪要識得收埋自己，先算係成長呢?
我以前覺得委屈嘅時候就好鍾意喊，而家慢慢大個，唔知幾時開始我擅長或者習慣去忍耐負面情緒。我已經好耐冇對住人喊過，就算嬲都會努力忍耐，盡量用少講嘢嚟代替，令自己望落正常，因為我唔想畀任何人知我唔開心，唔想畀人覺得我脾氣唔好。
我開心自己進步咗，唔再好似以前咁發洩情緒，畀同學話淨係識喊，我喺人哋口中會係個開心樂觀嘅人。
予盾嘅係，我又有啲失落。真係好唔開心，忍耐唔到我嗰陣嘅情緒嘅時候，我衝動咁諗過打畀朋友，但冇理由要佢哋為我情緒負責。我打咗畀一個親密啲嘅屋企人，但我又開唔到口，我驚我一開口就會暴露自己喊緊，聽住佢一句句嘅喂，我更加想喊，最後只可以cut咗佢線
當刻我好挫敗，我好似已經淨係識得去壓抑住、摺埋自己，我唔會暴露自己嘅情緒畀人睇，唔開心但一定要同人交流嘅時候，我就扮冇嘢，我覺得自己好虛偽，但我剩係識得咁做
人係咪都係咁？自己消化情緒、自舔傷口、祈求快啲大個，擺脫唔開心嘅事同人，但我由小學就祈求緊「升中之後就唔會接觸到，可以忘記曬一切」而家中學都忘記唔到，以後大個又真係擺脫到咩？
多謝大家用心睇完
Sor for 1999