#NSS個人
[GUEST] 唔知大家嘅生活過成點呢？有冇諗過自己其實有一日會突然結束生命？呢件事以後，我對生死有新嘅睇法。
幾個禮拜前，我放學肚餓就喺一間糖水舖食完碗甜品，之後咪打算返屋企囉。我嗰陣時喺度諗緊啲好無厘頭嘅嘢：「到底 Boris Johnson 幾耐先梳一次頭？」呢個時候嘅我完全放空，對周邊環境冇一啲警覺。
呢個時候，我準備過馬路，但腦袋依然放空，完全冇打算向左望下有冇車。對腳一直引領住我準備行出馬路，個腦袋始終唔生性，冇諗住煞停自己。
終於我同死神見咗個面，可以話係第一次。正當我距離踏出去馬路尚有一步之遙，耳邊忽然響起咗下「噹噹」嘅聲音，就好似係老師喺課室嗰陣時鍾意攞嚟震懾同學嘅鐘。呢兩下聲非常清晰，好似真係喺我耳仔隔離咁響。
聽到之後，我終於煞停腳步，正打算向後望之際，一架紅色的士高速喺我面前駛過，完全冇收油或者響鞍，真係距離我好近好近，近到好似同朋友傾計嘅距離一樣。我嚇親，即刻往後退咗一兩步。
回想起先頭嘅「噹噹」聲，我再擰返轉頭，咩都冇。冇人喺我後面，更加冇所謂嘅鐘。
呢個時候嘅我驚慌失色，不過見到冇車就小心翼翼咁過返馬路。距離我屋企嘅路程係一個地鐵站，一概廿分鐘左右。呢廿分鐘入面，我右邊嘅眼皮一直不斷咁不受控制去跳動，好似心跳咁。
返到屋企，我依然不斷回想去嗰件事，直至而家。生死可以離我哋好近，甚或是忽然嘅一刻。希望大家珍惜眼前嘅所有，唔好令自己後悔。
最後係提大家小心過馬路。