#NSS愛情
[GUEST] 小弟今年year2，追咗一個女仔一年，想比大家一個警惕。
我就長話短說，唔講太多追佢嘅過程。
首先佢係個好安靜嘅女仔，好多同學都覺得佢好難捉摸。不過，同佢熟咗之後發現原來佢私底下好活潑，都會追韓國男團，會對住偶像花癡，身邊又有一堆女性朋友，平時都會有啲閨蜜之間嘅親密接觸，又會傾下動漫靚仔嗰啲，所以我一直都覺得佢對男仔有嗰種興趣，而呢種對外對內嘅反差又令我更加鍾意佢。
直到我哋嘅關係開始熟絡，我會主動約佢兩個人一齊出街，彼此都越嚟越多肢體接觸，佢有時情緒高漲嘅時候會翹我手，察覺到之後又會慌忙咁抽番開，驚我唔鍾意。
每次傾計都真係覺得佢好cute，又覺得我哋又進一步拉近咗關係，都幾曖昧。
喺某次我鼓起勇氣，喺氣氛正好嗰陣打開咗啲有關愛情嘅話題，原本仲打算趁機問佢想唔想試下，點知仲未講出口就……
「如果你係女仔我諗我應該都會幾鍾意你」
突如其來聽到呢句，我下意識咁「吓？」咗聲，之後傾下先知，原來佢一直都鍾意女仔，有過嘅ex都係女仔。
佢話呢件事佢一直都有收埋，係信任我先至會同我講，亦都係第一次同男仔講，都驚我會覺得反感。
我原本仲想測試下佢會唔會考慮下男仔，但佢答其實佢好明白，愛情呢家嘢無關性別，但單純係無論心理上定生理上都對男仔完全冇feel，相反地佢好清楚自己嘅心之所向對女仔係熱情好多，亦都好希望以後嘅伴侶係女仔。
嗰刻我嘅心情真係跌到落谷底，明明感覺已經垂手可得卻又一瞬間變得無比遙遠，諗起一直都係我自己一廂情願，以為我哋一直都有進展，就真係好想喊。
以前嘅我，淨係聽過同性戀向異性戀表白嘅時候會有呢種情況出現，再加上兩種性取向嘅數量普遍相差較大，所以一開始追佢嗰陣完全冇假設過呢種可能性。
呢次都算係一個教訓，建議大家追心儀對象之前先測試下對方嘅性取向，唔好以為性別差異所造成嘅曖昧感係理所當然。