#NSS家庭
[GUEST] 第一次投稿，希望Admin會po ig ，我連自己都估唔到我會有需要去投稿去搵意見嘅一日。
小妹今年中二，細細個嘅時候自己已經好冇自信，但係漸漸開始發現我冇自信呢個問題變得更加嚴重。
由幼稚園開始我就有學跳舞，我阿媽每次都會講我邊度做得唔好，叫我去改，好似從來一啲都冇讚過我咁樣，令到我細個嗰陣覺得自己做得好差先會搞到阿媽好燥底。
而而家嘅我成日都覺得自己未做得夠好，再加上我自己唔知點解好驚青（？ 所以唔敢喺任何人面前表演，連我阿爸阿媽都唔敢，因為我驚佢哋又會話我。除咗屋企人同埋我最好嘅朋友之外都冇人知我係識跳舞，每日都只係會靜靜雞或者喺屋企冇人嘅時候自己係間房到練習。
由呢排開始我阿媽就成日鬧我做咩明明識跳舞都唔見我喺屋企有去練習，由細個學到而家你唔好同我講而家要放棄。我聽完之後我咩都冇答佢，我知道就算我同佢講我喺屋企有練習，佢都唔會信我，而我更加唔敢同佢哋講個原因：係我冇自信所以唔跳舞俾佢哋睇。其實我成日都想真係去表演俾人睇，但係我就係冇勇氣去行出呢一步，亦都好羨慕人哋會有呢一份勇氣。
呢排我發掘到一啲新嘅興趣，我好想去嘗試，但係我又冇勇氣去同我阿媽講我鍾意呢一樣野，我驚佢又會話我呢啲嘢唔啱我，都係算吧啦，所以我就冇講到比佢哋聽，等佢哋唔係屋企我先自己一個去試。
好想問吓大家我而家應該點樣做好，我點樣先可以有勇氣同埋有自信，每個禮拜都畀佢鬧一次同樣嘅嘢，我真係唔知可以點。
Sor for 1999