#NSS個人
[GUEST] 小妹今年升F1，本來興趣班裏面有個感情超級好嘅best frd，稱佢A，之後有人都好鍾意同A玩，於是佢就挑撥離間，之後我同A同嗰個人絕交，但點知嗰個人個家長同好多家長都好熟，結果就開始唱衰我，當然A我阿媽同我阿媽都識，對我印象依然好，但A就好似變咗…
我件事完咗之後我哋決定同挑撥離間嗰個人玩返，佢都同意改過（稱挑撥離間嗰個B）當然我係唔樂意同佢玩，我嘅直覺覺得佢本性難移，但係A似乎好歡迎佢，咁我最後都算啦，咁咪試吓一齊玩囉~之後B個阿媽唔知同啲家長講咗啲咩，A佢以後冇約過我，我約佢佢都話唔得閒，求其噏啲藉口俾我，但奇怪嘅係，A個阿媽對我嘅印象仲係好好，好鍾意我，初頭我都信A講嘅嘢，佢係因為忙，唔得閒，有嘢做，先至唔同我約，畢竟佢係band1A，但我同佢仲有B到住同一個屋苑，我知佢呢排忙，所以我好耐之前約定佢25/7即係今日，可唔可以去海洋公園，佢話佢考咗入一間好學校要努力溫書所以拒絕咗我，但點知今日比我見到佢同B一齊喺條街度，於是我就跟住佢哋（我知咁樣唔太好，但嗰刻我控制唔到自己）我見到佢哋一齊去咗買best frd手機殼，仲即場換咗…我真係好唔開心…佢哋成日話我小題大做，少少嘢就喺度煩，但佢哋真係比唔夠朋友應該比嘅安全感我，仲話best friend，唔好講大話先得唔得？
至於嗰個B，佢話嘅改善其實一啲都冇改，佢依然係成日口厚住塊面皮咁插係我同A中間，然後約A玩，特登係我面前講大聲啲，我帶着耳機都聽到，咁我都想一齊去玩㗎嘛，我就問佢你地講咩呀？B就即刻話冇嘢冇嘢，我即場問A，佢唔出聲，個氣氛好尷尬，但因為呢件事我真係唔開心咗好多日…我講出嚟佢哋又話我小題大做…
我喺呢度投稿想發洩之餘都想大家幫我諗吓計…有咩方法先可以令到A變返之前咁佢會主動約我，我約佢佢會盡量抽時間，唔會對我講大話，同埋有咩方法可以令到B唔好再咁，或者有冇可能令到我哋可以直接唔同B玩，但問題係佢個阿媽會打電話，希望大家唔好叫我放棄🙏🏻我覺得仲有希望嘅…畢竟大家都一齊玩左7-8年…啲有用嘅啲評論希望唔好介意我用small acc dm你