#NSS學校
[最近學校有好多大陸老師] （唔想睇咁多字可以直接係〔問題〕果到開始睇）我係呢到直接講啦⋯我今年F3，而我老豆阿媽同我全家都係香港出世長大，冇返過大陸住，同埋基於我阿媽唔鍾意簡體字，所以我平時睇簡體我都係估估吓，啫係根本其實就係唔識同冇讀過有關簡體字嘅嘢。
咁其實學校有大陸老師我平時係完全唔覺得有咩問題，我都係嚟讀書啫。我本身乜技能都冇直頭廢到冇得再廢所以咪要自己好好地讀書。
但係學校老師非常有問題，但因為我想挑戰自己耐力同埋覺得自己要跳出舒適圈，如果唔係大個之後就越嚟越玻璃心，所以就算我阿媽嬲到要我轉校，我都話我讀得好開心。
〔問題〕
但係今年突然間有大概好幾個大陸嚟嘅老師嚟，佢地大部分時間係寫簡體字，我成日都要舉手問老師果個字係咩意思。然後我宜家簡體繁體亂曬⋯⋯
繁體簡體呢d嘢都算其實都未算大問題。但係d老師個個都唔識講廣東話。我班主任兼訓導組老師，佢係今年先入職。上次發生咗d嘢，跟住比訓導組捉左落訓導室，我只係旁觀者，我冇參與過但比老師誤會，我駁命解釋，但係最後就因為班主任講唔到廣東話，而我又唔識普通話，雞同鴨講咁，我比人記左警告⋯⋯（ps.我阿媽最後打左翻學校鬧佢，完全唔理佢聽唔聽得明廣東話一味狂鬧，取消左警告）
老師們聽唔明又唔識講，最後仲要用佢大陸學校果套校規罰我地，明明我地冇犯校規。自從佢地嚟左之後，我地班學生365日24小時幾乎都係比d大陸老師罰（因為大陸學校嚴⋯）問題我地校長又唔理⋯d老師咪得寸進尺囉。咁其實我小學有學過普通話，唔係完全聽唔明，但係老師應該係北方人，講嘢好lur仲要一大堆兒化音，我聽到一舊雲咁。
長篇大論講完啦，我淨係想講，老師你落嚟香港教書可唔可以搞一搞廣東話基礎。我地學校有個老師講廣東話唔好，我地都唔會笑佢啦，老師學都唔學吓⋯我地班有大陸人啫，但唔代表冇香港人。同埋麻煩，我地學校其實有校規，唔好用你果套連呼吸都犯校規嘅規則去懲罰我地⋯⋯