#NSS家庭
[GUEST] 我有一個細佬，屋企係重女輕男，老豆同佢嗰邊既親戚都偏心我多過細佬，阿媽就好少少，唔會做到出曬面，但睇得出佢對細佬仲嚴格過對我。我阿嫲阿爺由細到大都好錫我，成日偷偷塞啲錢俾我，叫我唔好話俾細佬聽。老豆更加係寵到我上天，我想要既嘢佢都會諗盡辦法俾我。一直以黎我都以為自己只係個特別幸運既人，有個所有人都愛我既家庭，所以我好感激，亦都有意識要做一個令屋企人放心既「好孩子」。
我開始意識到屋企人並唔係想象中咁好，係我發現細佬唔知點解瘦咗好多，而且時不時喺佢身上發現咗傷痕。當時我以為係佢喺學校俾人欺凌，但我問佢佢只係否認被欺凌，而對真正造成傷口既理由避而不談。因為我同佢唔係同一間學校，所以我無法得知佢喺學校既情況，但做家姐既點可能唔擔心佢呢？我開始去接等埋佢放學(我放學行過去佢學校啱啱係佢放學既時候)，然後一齊食lunch先返屋企，但係我發現原來老豆一個禮拜淨係俾200蚊零用錢佢……佢除咗要食飯之外，買嘢搭車全部都係自己出錢，每日30蚊都冇點夠一個仲係青春期發育緊既男仔食？我以前覺得屋企人只不過係偏心我少少，所以我盡量對細佬好啲，細佬又乖又靜，我就自以為佢同我一樣，點知原來我屋企已經係重女輕男到好嚴重既程度。我本身唔係一個大洗既人，食飯都唔偏好食貴嘢，但有既零用錢已經好多，屋企人平時仲時不時醒啲俾我，但係細佬就連食飯既錢都唔夠……喺我追問之下仲發現呢排佢俾我老豆打，原因係佢喺學校畫畫要買畫具，老豆覺得咁嘥曬啲錢。
我聽到嗰陣除咗好嬲之外，仲好自責同愧疚，我覺得自己好似生活緊喺平行時空，家庭幸福美滿既幻覺下係我享受緊喺細佬到剝削返黎既愛。我細佬一直都係個值得所有人為佢驕傲既人，佢畫畫好好睇，讀書都唔差，性格溫柔又隨和，我覺得佢一定值得擁有同我同等既愛。但即使佢咁優秀喺屋企入面都係被不屑一顧。佢成日都自己收埋收埋唔肯同我講屋企人對佢有幾差，屋企人又有意避開我鬧佢，我真係唔知可以點算，除咗成日同佢一齊幫佢講說話，等屋企人為咗避我而放過佢之外，我咩都做唔到。
一邊係好錫我既屋企人，佢地真係真心愛我
，但一邊係我好愛既細佬，屋企人唔中意佢，我除咗盡力保護佢之外無能為力。
我細佬好堅強，又唔願意將傷口俾我睇，佢話唔想我見到唔開心……搞到我完全唔知屋企對佢究竟有幾差，暴力既程度又去到邊。
我究竟可以點做？
(ps唔知細佬會唔會睇到，如果睇到既話，唔該你，仲當我係你家姐既話就咩都可以同我講，咩叫唔想我唔開心，你覺得我而家好開心咩你個傻仔!!!!!!!)