#NSS社會
[[GUEST]] Admin Please Po IG Thanks.
我會投稿，係因為我覺得近排少部份香港人嘅心理少少問題。見到有好多人話覺得呢個世界太唔公平，點解有人一出世就咁有錢，點解我哋大部份人都咁窮。
我都窮，我都明白我哋一定係想有錢嗰啲人體驗一下我哋呢啲窮人嘅生活。但係呢個世界上嘅人唔係一出世就有錢，可能佢嘅仔女係。但係佢老竇老母可能都用咗好大嘅努力，先至創到業，先至可以令佢仔女享福。如果你有呢個能力，你會唔會都咁努力去做嘢，為咗令你嘅下一代享福？我相信你會。
冇錯呢個世界就係咁唔公平，邊個唔想做李嘉誠個仔女？但係同樣地李嘉誠得一個。唔好成日出道街見到人哋着名牌，就覺得呢個人有錢過我，然後就妒忌佢，或者咒佢敗家，你點知人哋係咪打part-time自己做返嚟？
我當然明白我哋會覺得不甘心，因為我哋根本未享受過有錢人嘅生活，未享受過餐餐鮑參翅肚，未享受過隨便揮霍金錢，未享受過住1000尺嘅屋。當你攞住一部鍍金電話嘅時候，你唔會將自己攞去同啲窮人比較，你只會喺度諗，點解我部電話鍍金之後，唔可以再加多幾粒鑽石？但係人嘅心態就係咁，自己處於一座山，就會想去另一座山，當你終於去到另一座山，先至發覺其實原本嗰座山更加好。
仲記得有一個post話點解有錢人可以私補，但係我哋只可以去普通大眾補習社。其實我哋係咪應該先認清楚，我哋去補習嘅目的係乜嘢？難道你去補習會有更有頭有面？難道你會好自豪咁同人講「我私補㗎」？呢個只不過係一個例子，更重要嘅係認清自己做每件事嘅目的，唔係為做而做。
當然，讀書的確係為咗成績，我哋大部份人唔會因為喜好而讀書。
所有偉人做偉人之前，都唔會覺得或者知道自己係一個偉人。香港人，自強不息。