#NSS學校
[Guest] 頭先見到有post話老師偏心呢個問題，我就諗返起小學嘅一件事想想分享下。由於呢件事實在太印象深刻，去到而家我仲記得好清楚。
咁小學個陣我成績就普普通通嘅，冇話邊科特別好。去到小四個陣，就有一個中文老師開始教我。佢好好人，每次上堂都好有趣好開心，仲成日送啲小禮物畀我地班。因為佢我中文成績變到好好 ，基本上都屬於全班頭幾。同埋都係佢令到我開始鐘意睇書。
個陣每個學期都有一個呢位老師舉辦嘅比賽，大概就係將所有有關中文科嘅成績加埋一齊嘅排名。每一次比賽嘅頭5定6名，就可以揀一個地方去，而啲錢就由個老師出。好明顯對於一個小學生黎講係好大嘅鼓勵同獎賞，所以個陣時大家都好努力讀中文。去到小六個陣佢都有繼續教我，因為係最後一個學期嘅比賽，所以好多人都更加努力。但係當結果出黎嘅時候，就有人傳話個老師做左啲手腳，令到最後可以去嘅同學冇得去，而一位佢偏心嘅同學去到。佢偏心嘅嗰個同學平時成績都好好，仲要成日擦鞋，但就咁啱個次失左手，於是佢就求個老師改左個分，令到佢可以去。但因為有佢嘅朋友睇唔過眼，就講左出黎。需然全班都知呢個老師不嬲都有偏心，但冇諗過佢會咁做。最後因為大家都好不滿，個老師就認左佢真係有咁做，仲要係全班面前公開咁話自己係偏心。對於細個嘅我，仲要係一個咁鐘意嘅老師講啲咁嘅嘢，真係心都碎埋。自此之後我就冇再特別鐘意邊個老師👌🏻