#NSS學校
[GUEST] 第一次投稿有錯請大家見諒（長文慎入
望版主post🙏
我究竟有咩問題…
小妹今年F.4，入學嘅時候一個識嘅朋友都冇，直到而家都係一樣，我覺得自己係有社恐，每次有人同我講嘢嘅時候都會好驚，心跳加速，手震，但又要扮都冇事咁，即使對方冇惡意，明明同家人或者以前嘅朋友講嘢嘅時候可以講到好大聲，但答問題嘅時候我明明覺得已經講到好大聲，但其他人都好少聽到我講嘢，而我認為自己喺人哋眼中應該唔會覺得我係社恐。
有一次活動嘅時候導師問我班嘅同學對我嘅印象係點，佢哋話我高冷，但其實我真係好想答佢哋但係唔知點解會好驚，自問我返學都冇做D咩會令人討厭我嘅嘢，每日返到課室都係坐自己個位做功課溫書，小息同午膳都一樣。
到左今年，我都係一如往常咁返學放學，我以為自己可以繼續平常咁過多兩年，但係現實始終唔會咁平凡。小妹有睇開GL/BL（我唔會歧視）咁啱俾我班上面既人知道咗，表面上係冇咩嘢，但係背後佢哋就係咁喺度話我，有一次喺廁所我聽到佢地話我係未鍾意女仔嘅，佢哋又唔會直接問我，表面上又扮到好有禮貌咁，但有時候又會扮睇我唔到，D男仔又成日笑我，話我係未鐘意女仔，咁之前都有大叔的愛， 我都見佢哋有討論，咁唔通佢哋會介意？我都唔明自己做錯啲咩，本來已經唔鐘意返學，加上自己家庭方面父母都唔理自己，學業成績又不太好，我都有同父母講過我可能社恐，但冇人信，依家我好唔想返學，感覺好大壓力，希望大家可以比少少意見我，點樣可以解決或者舒緩壓力🙏非常感謝