#NSS學校
[GUEST] 我的中學生活
戴返個頭盔先，我唔係要講啲咩晦氣說話，只係想鼓勵同路人。
考完dse就代表自己好快就離開中學，想藉此分享下自己嘅一啲經歷。
初中嘅我，中一成年都係俾人bully。當時我腦海中只係記得，冇一個人願意幫我。班上嘅人除咗欺凌者就係旁觀者，個個都係想置身事外。班主任唔理，冇朋友，唔想屋企人擔心。當時又唔識得搵社工，結果連自己都討厭自己點解會咁，自暴自棄，反正都唔會有人嘗試了解我，就由我自己捱過啦。
當時有一個女仔，叫佢做A啦。A同我同班，但係佢冇參與到bully。好記得自己喺留堂室好無聊，未夠鐘嘅時候特登行過去搵A話有咩功課。當時嘅佢好認真咁同我講有啲咩功課，明明日日係班房都見到我欠交所有功課，但係佢都無理。我知道對於佢嚟講，依件只不過係一件小事，但對於一個從來都冇人關心過嘅人嚟講，仿佛得到救贖一樣。你嘅一言一行，可能已經扭轉一個人嘅命運。所以多啲關心身邊嘅人，可能你嘅一句關心，已經勝過千言萬語。於是乎，就好似拍劇一樣，我開始努力讀書，從頭改變自己。係度好想多謝副校長同石Sir，雖然你哋未必睇到，但係你哋冇放棄過我，一直喺留堂班陪住我成長。
中一嘅我讀英文班嘅，由於成績唔好中文自然就去咗中文班啦。喺依度認識咗一班好同學，一齊玩，一齊哈哈大笑，係我未體驗過嘅校園生活。好多謝你哋，令我明白到成績唔係一切，有時單純地講下笑就一日。嗰陣時有個癡線佬話要從D班讀返上去A班，我心諗，唔好講笑啦，邊可能做到。點知佢又真係好努力讀書，搏曬老命，為嘅就係要讀A班。喺度要好多謝你，你嘅行動鼓勵咗我，原來為咗一個目標可以博盡。就係咁，開始一場逆轉嘅試驗。
皇天不負有心人，符碌咁俾我入到精英班。中三嗰年係我整個中學生涯最美好，最懷念嘅一年。不但遠離咗嗰班bully我嘅人，而且重新做返自己。初頭以為精英班嘅人都係不食人間煙火，但原來佢哋就好搞笑，面對沈重嘅學業壓力，佢哋識得點樣放鬆心情。喺人眼中嘅成就，往往背後都係附上難以想像嘅努力。喺依度，我認識咗一群好朋友，好多謝有你哋身邊嘅一年，所有嘢都好美好。最重要又俾我遇到A，真真正正同妳相處。妳講過我唔成熟，唔理人哋感受，煩得嚟又要講經，成日放負etc。唔知妳睇唔睇到，但我想證明俾妳睇，我真係有聽妳講，真係有改。希望妳快啲好返，好多謝妳，冇妳就唔會有今日嘅我。
快樂嘅時光總係過得特別快，哪一年就過去。正當我以為可以過返啲開心嘅校園生活，高中嘅巨輪卻提醒自己面對現實。A疏遠我，各位舊時嘅朋友都各散東西。上到高中，好多嘢都唔同咗。中四嘅時候識到另一班同學，一齊度過唯一嘅高中生涯。中五停課，根本幾乎冇返過學咁。遇上疫情，返學嘅時間越來越短，連考試都史無前例地取消。當可以返學嘅時候，dse已經開始倒數。咁就結束六年中學生涯。
（分隔線）
好多時候都係一個人，一個人返學，一個人放學。一個家底差嘅男仔，連想同人做朋友，都無資格。作為跨區學生（同病相憐嘅加油），少不免長途嘅車程。食飯嘅時候，因為經濟原因，選擇帶飯。慢慢咁，大家唔再一齊食飯。做group project嘅時候，個個都有自己嘅小圈子，一早搵定隊友，自己就係剩低被人厭棄嘅人。唔係冇能力亦都唔係free rider，只不過冇人想同你一組。班房坐位，坐邊度都冇所謂，反正都係咁。好似我依啲邊緣人多數都係去library摺，得閒咪行下campus。從來未試過約人出街食飯，唔係唔想，而係唔敢。冇gathering，冇共同嘅回憶，剩低就係自己一個。
用social media，十個內面十個都係自己主動搵人嘅。人哋得閒嘅咪hea覆你，唔得閒嘅直頭已讀不回，甚至不讀不回。次次都係你錯，傾唔掂就block埋你。講得好聽叫做人緣好，講得唔好就係R friend。 永遠只有需要你幫手嘅時候，佢哋先會主動搵你。搞掂完，就唔會再有交流。怪就怪自己成日都係yes man，叫到幫手一定幫（又名工具人）。個個對自己嘅印象就係好人，但係撫心自問，到底我值不值得做好人。雖然人人唔會為我，但至少我為人人。對得住天，對得住人，對得住自己，無害過任何一個人。所做嘅一切都無愧於心。
但係我唔甘心，既然人地唔了解，被人睇低。我就要更加努力，唔想俾你哋班人睇死。唔講唔代表啱，只不過無謂嘅爭論就算。我攰啦，唔想再同你哋班人玩俾面派對。一個人嚟，一個人走。雖不完美，但求完滿。所以，大家唔好咁輕易應輸，儘管未必有人明白，但要堅強地頂住。好多時候我都無能為力，個個都收收埋埋，其實可以試下主動啲搵人，相信你哋會搵到一個願意聽你講嘢嘅人，俾佢知道有人陪伴就夠。You are not alone。雖然依個世界好cruel，但請嘗試做個好人。
PS 自己唔識點樣表達，睇怕中文作文實死冇生。（都考完啦，擔心咁多都冇用，活在當下）
sorry for 1999