#NSS文化
[Guest] 大家好，小妹有一件事喺個心哽住咗幾年，所以希望講出嚟可以有人答到我。
話說幾年前，照顧咗我好多好多年嘅親人就過咗身。咁喪禮嘅禮儀係跟佛教嘅，個師傅就話要擔花買水。咁我阿爸係長子，我又係最大個女，而且仲係呢位親人由細睇到我大，所以大家就叫我做個儀式。但點知個師傅望咗我一眼，就即刻問有冇男孫，最後就揾咗細我好幾年嘅堂細佬出去。
相信好多人都知道我點解會有嘢哽住，又會覺得明明係親人喪禮，我點解要咁吹毛求疵。冇錯，我係唔明我點解我唔可以擔花買水。喺個師傅問「有冇男孫」嗰一刻，我個心真係好痛。唔通我係女，就唔可以送我親人最後一程？點解男仔就會被優先選擇呢？佢用盡自己最後嘅時光照顧我，仲講過如果唔係有病，佢唔想咁快離開我。我只恨自己點解唔係一個男仔。
可能係我年少唔懂事，唔識得有啲禮儀係必須遵守嘅。但好對唔住，請問啲裏陳腐嘅封建「禮儀」，有冇得改變？有冇行家可以解答到我……