#NSS愛情
[GUEST] 我曾經愛過你。
你同我一直只係朋友。我知道你心入面冇我，而係裝住另一個人，所以我從頭到尾都冇同過你講，其實我真係好愛你。你不經意同我嘅對望，你不經意掂到我隻手，你講野不經意望我，你各種嘅不經意，可以令我諗成日。我可能係個多情善感嘅人，或者甚至係一個癡情嘅人，但係就係咁樣維持左兩年。
你唔開心，我陪你傾計傾到半夜，瞞住我屋企上下，瞞住我啲朋友。你同我傾訴，我儘量聽、儘量表示我理解、明白你嘅心情。雖然有時你會將你嘅情緒發洩落我身上，我都同自己講，係你壓力太大，冇事嘅。你開心，我陪你聽你鍾意嘅歌，聽你講你鍾意嘅歌手，嘗試去欣賞，去同你鍾意同一樣野。但係我忽略左嘅係，從頭到尾都係我關心你嘅喜好。你好似從來都冇問過，我鍾意啲咩歌，追啲咩明星。我竟然有幾個瞬間會以為，你同我，真係有可能。
冇諗過，我只係講左一句話，就毀滅左我地嘅友情。
我只係一句發洩，一句抒發自己內心嘅鬱結，結果你好大反應。我嘗試解釋，嘗試了解你咁大反應嘅原因。你竟然話我冇膽，話我剩係識睇人面色做野。你仲講左好多過分嘅野。唔知你記唔記得？
我知道我都講左好多唔應該講嘅野，爆晒粗咁。當我冷靜啲嘅時候，我好絕望。我知道，依家我地連朋友都做唔落，何況係戀人？
事情過去都超過半年啦。我係時候放低對你嘅感情。呢幾日諗番起我地之前嘅爭執，竟然，我第一次冇喊到。
我以旁觀者嘅角度去睇我地嘅關係。一直以來，我所謂對你嘅幫助，其實都係出自我自己嘅角度。到底我有冇諗過，你嗰刻需要嘅係咩，定係以自己嘅觀點黎衡量？而你，係咪真係當我係朋友，定係一個比你發洩嘅沙袋？我地嘅關係，究竟有冇我之前諗得咁好？
如果各位睇到黎呢度，都多謝你睇晒。我奉勸各位睇清啲自己同埋其他人嘅處事模式。好多時候，人與人之間嘅嫌隙一早就有，只係唔知幾時先會破裂，毀滅一段關係。希望大家對人、對自己，都好啲。