#NSS個人
[GUEST] haloo～admin唔該可摸耳po上後備ac？因為唔想俾同學睇到 辛苦admin～
（少長慎入
今年升中但係阿爸唔俾我揀band1
小妹今年p6，成績中上，band1c，我阿爸唔俾我揀一間我嗰區嘅band1b傳統名校（叫住S中學先），因為佢覺得好遠（黎到「遠」嘅意思係指需要搭車先去到）佢就話揀一間唔使搭車都去到嘅學校最好，佢嘅原因係因為驚我打風落雨會唔識搭車返黎，但係我始終都係會大個，唔俾我自己試下搭車返學咁到時出到社會俾人笑？咁佢自己心儀嘅嗰間學校我就叫佢P中學先，P中學係band2尾band3頭，之前都有啲黎間學校嘅學生欺凌人哋嘅片流咗上網，校風麻麻，但係好近我屋企同埋係我小學嘅聯繫中學，因為banding同埋校風所以我就真係唔希望入黎間中學。
老師之前喺家長會有推展過我去揀其他區嘅band1c一樣都係傳統名校嘅中學，但係我阿爸話嗰間學校仲偏僻過S中學（而我自己覺得揀嗰間不如揀S中學好過）所以就冇考慮到啦。老師之前都有喺電話到講過面試階段可以將S中學擺第一志願，第二志願漏空，我阿爸當時就妥協咗。可惜嘅係，我S中學嘅面試冇pass到，嗰陣我都開始諗係咪自己實力問題，自己好似浪費咗老師幫我爭取嘅機會，覺得好對唔住啲老師。
咁依家唯有玩統一派位啦，一樣都係按老師嘅策略，將S中學擺甲部同乙部第一格，再將P中學擺喺乙部第二格，我知黎個組合好奇怪，因為兩間中學banding相差太遠，但係為咗滿足我同我阿爸嘅意願，就唯有咁樣啦。（我自己理想中嘅編排絕對唔係咁）我今個星期六就有家長會，希望到時班主任可以說服我阿爸改番啲次序啦。
我好多次同朋友講過自己真係真係唔想入P中學，而佢哋都覺得我入到去真係曬咗。我有嘗試同我阿爸講過黎件事，但係每次都會俾佢鬧到狗血淋頭咁，佢仲當我係細佬仔，話我依家反叛期，人哋話東我就去西，話我仆街冚家剷，真係每次聽完都覺得好唔舒服，佢講啲說話真係好難聽。我身邊啲朋友老師好好，佢哋清楚我嘅情況，成日安慰我，但係我自己冇幾耐又會諗番起我阿爸講嗰啲嘢，又開始唔開心。
最後，其實我都係想問吓大家可以點做好，點樣先可以說服到我阿爸？多謝你好耐心咁樣睇完，要diu嘅話輕手啲。sor for 1999