#NSS家庭
[guest] 大家好，小妹今年f2，懷疑有躁鬱症，少少嘢就好想大叫、喊、發癲，夜晚經常失眠喺度爆喊，少少嘢就諗好耐、煩好耐，搞到自己好唔開心（自己控制唔到亂諗嘢）但係自認都有好好控制自己嘅情緒，發脾氣嘅次數大概 一年唔多於三次。
咁我媽媽就係公認 脾氣暴躁嘅，少少嘢都會鬧爆我或者阿妹，有時無啦啦大叫，嚇到我彈起，同埋非常無理取鬧，好多鬧我嘅原因都係無中生有，通常我俾人鬧都係一頭霧水。咁我本身就唔太醒目，（喺屋企弱智咁，出到去就冇咁唔醒目）做嘢會亂曬手腳，做得好慢，或者好少事都唔識做（應該係因為太緊張，幫其他人手嗰陣唔係咁弱智），之後佢就會鬧到我飛起，發曬癲咁，阿爸有時都會一齊串/笑我唔醒目。
我面對呢啲情況，大部分都係任佢鬧任佢打，但係有時真係會駁嘴，例如我失眠，佢早上7:00左右都會叫醒我要我落街幫佢買飯（其實佢自己都買到），我同佢講 我啱啱先瞓著，之後佢就會狂鬧我，我覺得咁都幾無理，咪黑曬面咁換衫出門口，佢又鬧我態度唔好，我忍唔住反問佢「你唔覺得自己有問題？」佢更加嬲，然後我爸爸要出嚟做和事佬。呢啲事都發生得幾頻密（對我爸爸嚟講）
我唔認為我係發脾氣，就算係，我反問完佢之後都有係咁道歉，最尾都係佢係咁鬧我，全程我淨係出聲問咗一句嘢。但係我媽媽非常識得加鹽加醋，佢會同我爸爸講「頭先你個女話我臭雞啊」「佢有鬧我啊」咁我緊係有澄清啦，但大家都仲覺得我脾氣差。
咁問題嚟啦，我爸爸成日話我脾氣好大，成日黑口黑面好難搞，話我成日俾麻煩佢。咁小妹本來個樣已經係好似黑面咁，再加上克制情緒嗰陣會有啲嬲，面色唔係幾好，但係我認為呢啲唔算發脾氣，反正阿爸阿媽見到我黑面都會繼續鬧，同埋黑面呢啲真係改唔到，我個樣就係咁。
最絕望係，我覺得自己已經好努力控制情緒，脾氣已經好好（對自己而言），我成日都好想打人，個腦裡面有好多血腥嘅畫面，但係我次次都有忍住，講出嚟嘅只有一句「對唔住」。
同埋 講真，喺呢啲環境生活，我有可能脾氣好咩，唔多唔少都會學咗屋企人嘅言行舉止，點解佢哋可以想鬧人就鬧，我為自己發聲一次都唔得？
想問大家我可以點做？
（sor for 1999，有錯字/九唔搭八真係非常非常抱歉，有冒犯到各位嘅話都非常抱歉，一時用「小妹」一時用「我」係有啲難睇，對唔住對唔住對唔住）