#NSS學校
[guest] 回應NSS220320F（即係講學校包庇成績好學生嗰一個投稿）
我同嗰位樓主一樣都係中三，小學五六年班嘅時候經歷咗好多，間學校好似變咗古代宮廷咁，個個喺度玩宮鬥。
我哋嗰陣時中文科由一位副校長教，下稱K副校，佢好愛一位同學，下稱J同學，J同學屋企好有錢，經常捐錢畀學校，仲會成日送禮物俾老師討好老師。由於我哋普通學生同埋佢哋嘅爭鬥太多，我淨係會分享最大單嗰一件。
當時我哋派數學卷（冇記錯係呈分試），有一條題目我哋好多同學都答啱，唯獨J同學答左一個奇怪嘅答案。J同學扮晒嘢同佢媽媽講，叫佢媽媽幫佢上訴，然後佢媽媽就不斷捉住數學老師同數學老師上訴。之後經過數學老師嘅討論，學校同意咗佢個答案，俾答呢兩個答案嘅學生都可以攞分。
突然之間有一日，數學老師無啦啦同我哋講學校只接受J同學個答案，本身最開頭答啱嗰啲一律當錯，會扣分。咁因為呈分試關係，本身答啱嘅同學都好緊張，個個都好唔開心，一眾家長亦都唔明點解要改答案，希望學校取消條題目，不過學校唔願意。
最好笑J同學突然向K副校指控我哋欺凌佢，甚至亂作我哋之間有同學篤佢額頭，令佢受傷。明明K副校唔關事，但係佢無啦啦差隻腳入嚟呢件事，仲要對一眾無辜嘅同學作出各種無理嘅懲罰。當我哋以為校長會作為中立者介入，校長竟然因為J同學捐錢多，包庇佢，連同K副校一齊針對一眾同學。自此之後，冇同學夠膽再出聲，每個人都驚咗J同學同埋K副校，怕佢哋會再做出啲咩行為。
我講呢件事係想證明香港嘅教育制度究竟有幾大問題，乜捐錢多就係代表一切？咁同貪污有咩分別，學校係社會嘅縮影，當大家以為香港呢個地方唔會再有呢啲事發生嘅事情，竟然會喺咁多學校之中發生呢啲事。老師教學生唔應該犯法，但係校長老師本人就一直做緊呢啲事，請問公義何在，教育嘅理念又去咗邊。