小弟今年中四。最近同小學班friend去海旁吹水,一班男仔聚埋一齊不外乎都係講下女仔,大家啲學校野咁,講起一個小學既女同學（依家同我朋友同校）幫過我個friend處理過啲男女感情關係, 本來我都係多口問下嗰個女仔最近點,班friend就同我講個女仔靚咗好多,我就記起以前碌ig見過佢個樣係唔同咗,其實個晚都冇咩特別野發生。
但係有一日温完書就好攰,瞓咗成半日先起身,小弟平時瞓得好少,而且好少會發夢,但係嗰晚就發咗個夢,唔知點解全部都係關於同嗰個女仔相處既野,但係明明我以前同佢唔係好熟,唔明點解無啦啦會咁。平時我個人唔會因為一個女仔個樣靚唔靚就對佢有好感,因為覺得好似好膚淺,但係而家就好似違背緊自己原則。
其實小弟都就快去外國讀書(大約有半年到),所以都唔係好想拍拖,始終我覺得如果而家發展咗關係之後自己走咗去好自私,但係就想試下同嗰個女仔做朋友,認識下佢個人先。不過個friend同我講個女仔平時個人好自閉,唔多講嘢,同埋都冇乜男仔朋友,我覺得如果我無啦啦接近佢就真係好尷尬,同埋始終大家都唔同學校都唔知點樣同佢熟啲,想問下大家點做會對個女仔比較好。
辛苦大家睇篇長文🙇🙇