#NSS家庭
[Guest] 屋企有兩個廢老🥲
小妹今年14，屋企同父母、公公婆婆住，但係最近真係生活得好辛苦，亦都忍咗好耐，所以終於講出嚟。
可能你哋會覺得，就算點都好都唔可以叫公公婆婆做廢老，但係我已經去到一個忍無可忍嘅地步。見到身邊嘅朋友都生活得唔錯，以我自己好似好命苦，所以就有啲憂鬱。
佢哋嘅行為莫過於睇CCTVB/藍絲KOL，有時鬧下政府，有時讚下中国，有時diu下美國(因為我真係聽過佢哋用粗口鬧)，有時又鬧下嗰班佢哋口中嘅「曱甴」，我阿媽已經講咗好多次喺屋企唔好講政治，當然都係冇用，其實佢哋嘅行為多不勝數，我呢度都舉例唔到咁多。
有一次印象好深刻，即係我求其搵咗件黑色衫黑色褲落街買嘢食，然之後佢見到我到全身黑就鬧我著到成個曱甴咁，我以為我可以唔理佢，但係真係唔得，當時我心諗，其實我都係隨隨便便揀件衫，完全冇諗過咁多，相反得返嚟嘅結果就係俾人鬧，然之後我從此就冇咁樣着過。
因為而家疫情要上Online lesson，我自己又冇房，要同父母共用一間房，但係最慘嘅係我竟然喺房都聽到佢哋睇片或者睇電視嘅聲，同佢哋講咗好多次都冇用，啲聲真係完全影響咗我嘅學習狀態。
同佢地生活真係好辛苦，而家開始掛住以前嘅佢哋，明明佢哋以前係好錫我，成日買啲我鍾意嘅嘢食比我，仲要生活得好開心，但係佢哋而家成個人變咗。
講到黎呢度，我並唔係想博同情，都只係想抒發下我嘅感受，要大家聽我訴苦真係辛苦啦。最後都希望之前投稿講過想輕生嘅人唔好俾身邊嘅人影響，人生係你自己嘅，無論點都好都唔好放棄，唔好咁傻為咗其他人離開世界，有啲人唔值得你為佢而犧牲，唔好俾佢哋局限左你嘅人生，you deserve more✨