#NSS愛情
[guest] 小妹驚自己講嘢一嚿嚿，講定sorry先。
原來，你再冇鍾意一個人，但係只要你曾經愛過佢，你就唔能夠忘記佢。再見返佢，更加會再次心動。
六年級嗰陣，我鍾意咗一個男仔。點解我會咁犯賤，鍾意咗你嘅？明明你係搞到我第一次俾老師罰㗎喎。或者你哋會問，咁細個會知咩係真正嘅愛咩？唔知㗎，亂打亂撞咁囉。但係，喺畢業之後，喺你朋友口中得知，原來你都鍾意我。點解我當時咁蠢，唔覺得你鍾意緊我㗎呢？我諗返起，又真係有好多嘅蛛絲馬跡。
有一日上完體育堂，
你個朋友問你 :「打完波你唔熱㗎咩？出完汗仲着住件風褸傻傻地㗎。」
你冇答，只係笑咗一笑。當時你喺班房坐我隔離，我哋上返班房，
我問你 :「你真係唔熱咩？」
你都係冇答我，但係你拉低咗風褸條拉鏈，喺件衫入面攞咗條祈福嘅頸鏈出嚟，係一個手掌大細嘅佛祖吊墜，你望住我，笑咗一下，然後就將佢放返入見衫到，
你同我講 :「唔好講出去喎。」
點解當時嘅我冇諗過，明明我同你都唔熟，點解你會同我講，而唔同你個朋友講呢？
又有一次，有幾個女仔做錯嘢，老師逐個逐個同學叫出去，問知唔知發生咩事。我俾老師叫咗出去，嗰陣你坐我前面，喺我返嚟嘅時候，
你問我 :「返嚟喇？冇事呀嘛？」
我冇答你，
但係坐我隔離嗰個就話 :「你哋真係好似兩公婆，老夫老妻嗰種。」
點解我當時冇諗過點解佢咁講㗎呢？
仲有好多好多嘅事，我就唔再多講喇。
依家你有女朋友喇，我都有男朋友喇。但係我始終都係忘記唔到你，或者你哋會話我賤，但係你真係可以完完全全忘記一個人咩？你仲要係愛過佢。
錯過，可能係天意。如果我哋當初一齊咗，我哋去到唔同嘅中學，都注定係會分手，都係要受一次傷。不過，見到依家嘅你開心就足夠喇。
祝幸福🤍