[GUEST] 希望admin可以po ig 啦
小妹中三，移民嚟英國
嚟咗半年到冇乜特別開心反而傷心多過之前好多
好多人會覺得我身在福中不知福（當然我知有得移民好好），其實移民唔係好似去旅行咁開心，大家都淨係覺得移民離開香港好開心，唔係囉。過到嚟問題多多，日日以淚洗面咁（其實可能係我自己問題，resilience 低得滯）要喊根本唔係一件難事只不過係睇我得唔得閒，我得閒即刻喊到（應該去做演員），但又唔可以成日喊，喊到隻眼腫晒點返學呢。
過到嚟英國，係當然會識到friend啦 要返學㗎嘛，但係我本身個人比較內向同埋要耐啲先可以同一個人熟，仲有社恐，變到有少少唔識同人溝通咁，但係其實自問英文一啲都唔差溝通能力都幾好，溝通應該唔成一個問題，但就偏偏成日好似唔識講嘢咁。
我本身個friend group根本就係完美，我夠膽講如果我唔走可以做一世嘅朋友，直到老。但係而家淨係得facetime冇得再約出嚟挽，一齊返學，仲要移得民就梗係預咗一世都會喺英國（至少我成家都係咁諗）咁就即係永遠都淨係得facetime最多只係返香港一陣，都只不過係去旅行，我同我啲friend究竟要個心點樣永遠都唔變先可以繼續做一世嘅好朋友。其實好難，淨係少咗日日一齊返學，佢哋又唔係會成日好主動message嘅人，佢哋已經變咗好多，我特登就佢哋嘅時間傾偈一向即刻覆嘅變到兩日先覆lu。
以前我以為我一直係佢（friend group中其中一個人）最好嘅朋友，仲驚我走咗唔知佢會點呢，原來係我諗多咗，係我需要佢多過佢需要我，以前我哋差唔多日日都傾偈，而家？講出黎都笑死人，一個月講三次嘢，講親都係垃圾廢話，話facetime都只不過係好似開ig live咁冇嘢講。嚟咗只係半年成個friend group淨係得一個最最最friend嘅冇變一樣咁friend。諗返起我就走嗰陣時佢哋仲話要永遠keep住咁friend，寫俾我嘅卡我每次睇每次喊，仲要一次比一次喊得勁，真係笑死人，或者佢哋已經唔記得佢哋喺張卡上邊寫嘅承諾永遠咁friend lu，所有嘢都只得我一個懷念笑死。
由上年決定移民到而家移咗民嚟咗英國，呢段時間我諗係我暫時人生中喊得最多嘅時間。未嚟英國之前，我喊，驚同我啲friend冇得再咁易見面，唔再friend都仲可以見，而家？喊完都係咁，咁咪少啲喊囉。可能只係兩年前嘅我都冇諗過兩年後嘅我點解無端端會喺英國，仲要日日喊添。由細到大屋企環境都幾好，喺香港生活好好，所有嘢都好安定，我日日都好開心覺得自己好幸福，諗都冇諗過會移民。其實依家諗返轉頭生活安定同開心唔係必然，喺香港想移民但冇得移民嘅人，唔好淨係睇人哋移咗民以為好好，其實應該好好珍惜可以同屋企人朋友住喺同一個城市冇時差嘅生活。
雖然我講到移民嚟英國講到好似好差咁，不過其實係因人而異（我兄弟姊妹十分正常全家得我一個會喊到死咁），我個人比較難放得低同埋都幾依賴其他人，可能係因為呢啲原因令到我有咁嘅感受啦，就嚟移民嘅人千祈唔好睇完呢篇嘢覺得 自己好似去送死咁，其實有好多得着㗎。不過其實我都只不過係嚟咗半年，耐咗可能應該會好啲。就移民嚟英國嘅人唔好咁多擔心多挑戰但總會捱過去，唔好咁易放棄，加油！
衷心感謝你睇曬成篇野