Re #NSS219105U7
.
好心你哋班話要將來要從事電競，放棄學業，然後怨家長、怨老師、怨社會嘅人收一收皮啦。
.
唔係叫你放棄夢想啊，亦都唔係叫你安安穩穩咁搵份文員嘅工就算，而係你要幫自己留返條後路囉。你讀到中六畢業，都起碼可以搵到份工，保障你有衫著、有飯食啊。再睇睇電競？係，有人做到月入百萬，好風光啊，但係你睇下追夢失敗嘅人有幾多？嗰啲人，如果淨係靠電競養活自己，一早餓死街頭啦。你要冒呢個風險，就首先要有第二種技能，當你面臨失敗時都有另一條路行啊嘛。而喺呢個知識型社會之中，九成人都係靠學問或者技能過活嘅。你中學都讀唔好，點生存？
.
再者，做電競唔係同你班朋友打機咁輕鬆啊，好辛苦㗎。重複又重複咁練同一套動作，日夜顛倒，對住啲靶不停做，仲悶過你背書啊。為乜？咪就係為直播/比賽時要百發百中囉。實戰裡面嘅每一個失誤，都可能會令你嘅電競生涯結束㗎，壓力之大，你又承唔承受得起？你究竟有冇認真了解過呢個行業？
.
好啦，我俾你真係做到電競啦。你諗住做到60歲退休啊？當你18歲入行，做個三五七年已經退得休啦。唔係因為你搵夠錢啊，而係潮流唔興得幾耐，你搵唔到食㗎啦。到時你二十幾歲，冇乜學識嘅話，唯一嘅解決方法咪就係攞張紙，摺個兜，出去同啲老鼠啊、曱甴啊，一齊瞓囉。
.
夢想呢家嘢，你追到嘅話的確係人生嘅一樁美事嚟嘅。但係你係咪諗住呢一世人淨係學一種技能？你打電競，唔代表你可以大條道理咁唔讀書。掛住打機唔想讀書，仲幻想打機一定可以養活自己呢啲叫懶，同電競冇關係嘅😉
(圖源： Bloomberg.com)