#NSS愛情
[Guest] *文筆唔好,請見諒
*X=嗰個女仔
/
今日係2021年5月26日,我哋依家仲係同一班,但係關係卻變成了陌生人…
/
我係一個平平無奇嘅中學生,樣貌都好普通,但係都比我遇見一個我好愛嘅女仔。
/
中三下學期嘅某一日放學,我喺視藝室度趕緊一份功課要交。係我做咗一半嘅時候,有一個好靚嘅女仔行咗過嚟,然後打咗我一下——我望咗佢然後話:「你…做乜打我？」「嘻嘻,你估下！」佢講完之後佢走咗。過程中係好無厘頭,但係由呢一刻起,我就開始留意佢。
/
轉眼間已經到中四,熟悉嘅朋友都係隔離班,我俾人分配佢一個全部都係陌生人嘅地方,但係佢喺度——佢變得更加靚,更加得意。佢嘅一舉一動都吸引住我。
/
我已經發現我有啲鍾意佢。
/
但係奈何我知道自己同佢爭太遠,所以我冇主動搵佢傾偈,只係間唔中偷望佢幾下。上堂我覺得無聊嗰陣,只要望住佢,我咩煩惱都無冇晒,有陣時見佢唔係太開心嘅時候,我都會諗有咩方法氹佢開心。
/
佢好鍾意瞓覺,成日見佢上堂都會瞓覺,佢瞓覺個樣真係好甜💓所以有陣時我寧願望住佢瞓,都唔想聽書…
/
平時嘅小息,都會有一大班人圍住我,但係其實我好反感,所以成日都會搵啲藉口推咗佢哋——直到有一日嘅小息,佢坐咗喺我面前,然後同我講「做乜自己一個嘅？」然後係咁搣我同打我,但係我當下反而係唔反感（聲明一下我唔係抖M😐),我塊面之後紅晒,然後吞吞吐吐咁講咗句「無…乜嘢呀…」佢聽完之後笑咗出嚟,我都跟住一齊笑。
/
「早晨！」我手機wts突然間出現一句訊息, 仔細一睇,原來X,我嗰心當下有如小鹿亂撞般,跳得好快。然後我之後好快答咗句hello,就閂咗部手機。
/
轉眼間已經到咗聖誕聯歡會,記得最後係抽獎環節,而我好好彩抽中X嗰份——「你地兩個一齊合照呀！」老師叫我哋去影相。就係咁樣,我哋有咗第一張嘅合照。
/
但係點都諗唔到,之後疫情肆虐,中小學全面停課,我同X面對面傾偈嘅都因為咁而冇咗。不過好彩我哋有keep住用wts,ig,discord傾偈,每日都有去傾下一啲日常嘢……我哋嘅關係都越嚟越好。
/
三月嘅某一日,我同佢傾偈嗰提起過我今日生日,佢即時答咗句「今日係你生日？…」(我從來好少講自己生日俾人聽):「我會寫啲嘢俾你」我聽到呢句之後成個人開心到彈咗起身,然後開始期待佢嘅生日卡。
/
「快啲打開…」我攞到啲生日卡之後好期待——畢竟係人生第一次收到女仔送嘅生日卡同禮物,我感覺到無比嘅滿足。
/
到咗5月中,中學可以局部恢復面授，我亦都係隔咗幾個月未見過佢,見到面之後佢第一句就話：「要唔要一齊食嘢呀？」當然嘅係,係同佢啲朋友一齊食。但係我只係吞吞吐吐咁樣講咗句「遲啲先啦…」。其實除咗我份人好怕生之外,最大原因係都暗戀對象食飯會有啲尷尬…所以我都係拒絕咗。
/
轉眼間到9月嘅某一日,我鼓起勇氣係wts同X講:「我哋好似識咗咁耐未一齊食過嘢,不如一齊食嘢？」就係呢一句,奇蹟發生咗。佢講咗句「好」然後我哋揀咗去沙田譚仔度食——就係當晚,佢同我表白。
/
「XXX,戴斯ki」(原是日文,意思是喜歡你）
/
呢一刻,係我人生最開心嘅moment,我哋嘅情侶生活亦都開始咗。
/
我哋因為係同一班,所以每日都會見面,每日一到小息,放學,我都痴實佢,而時間都過得好快。到咗10月嘅某一日,我得到佢嘅同意,仲獻俾佢我第一個初吻。
/
但係情況不如理想……
/
係呢段期間,我發現到我佔有慾好強,無時無刻都想佢係我身邊,怕會失去佢,所以當佢出街嗰陣,我都會問多句會同邊個出等等。但呢個都唔算最大問題,最大問題係,我發現到自己有——情緒勒索。
/
每當我有陣時唔小心做錯野嘅時候,我下意識都會講好多句對唔住,同埋有陣時為咗令佢原諒我,我都會講好多好難聽嘅說話,例如「我知道你仲嬲我,我已經懲罰左自己…」、「如果你仲唔原諒我,咁我會傷害自己。」等等,呢啲看似可以解決到眼前一自己問題,但係我冇諗過係,原來呢啲對佢精神有咁大傷害。
/
其實可能每一次都係好小事,但係我就將呢啲事變大事,將佢哋睇得好嚴重,結果令到我哋嘅矛盾越大,對佢精神虐待嘅次數了亦都越來越多。
/
到咗一月份嘅某一日,X突然唔理我,咁我都好蠢咁有問佢咩事,結果今次唔同嘅係,佢答咗句「比我自己靜下。」但係我嗰陣唔明發生咩事,就係咁追問,完全忽略咗佢感受,仲係咁講對唔住。我完全唔知道自己根本就喺度傷害緊佢,而唔係愛錫佢。
/
過程中我係咁問佢啲朋友,而佢都知道左。佢問我點解要咁做,我就答佢係咪因為我做錯事……呢個矛盾越來越大,我亦都知道我哋好快會分手。但係我都堅持自己嘅己見——繼續逼佢。
/
我諗唔到任何解決方法,只好搵學校嘅心理輔導員幫我——我都因為咁識咗一個好好嘅輔導員。
/
佢同我傾咗一陣,發現到原來我一直都冇理過佢感受,佢需要嘅唔係不斷嘅道歉,而係一個合適嘅空間,但係奈何我冇比到佢。我自己後來都作出一啲改變,嘗試唔強迫佢,比空間佢。希望可以有改變嘅機會
/
「…我覺得我哋都係唔合適一齊繼續走落去」
/
我聽完之後好傷心,一方面係佢同我分手,而另一方面係後悔自己唔好好珍惜一個咁好嘅女仔,反而用上大量傷害佢嘅方法,令佢過得好唔舒服。
…
如果有得俾我重新選擇,我會好好愛錫佢,唔做出一啲令佢反感嘅行為,仲有忽視佢嘅感受
/
可惜一齊都太遲,正所謂早知今日,何必當初
/
如果你依家係睇緊呢篇文嘅,希望你會原諒我當日做出呢啲行為。
/
一個好愛你嘅薯仔