#NSS愛情
[Guest]
希望各位可以講下睇法，呢件事煩左我好耐🙇🏻♀️講下背景先，小妹中學生，中幾就唔講，有個拍左一年拖既男朋友。我地本身係超好既朋友，個陣發現自己鐘意左佢，糾結緊表唔表白嘅時候佢同左我表白，嗰陣時真係好開心，亦都係埋左一齊。同佢出街都還好，但係佢唔肯公開，喺學校見到大家只會點一點頭，呢樣嘢直到而家都係咁，介意一定有不過其他方面都幾好所以我就冇理到。
但係呢排發現問題開始出黎。
第一，佢成日唔睇我msg。
我唔係要佢秒讀，但係我真係唔相信兩日都冇一個時間攞起部電話覆我。
第二，聖誕節禮物。
我自己周圍跑終於搵到佢鐘意既figure，咁就送比佢做聖誕禮物。首先，有冇聖誕節禮物我真係完全唔介意，但係問題係佢比左一包糖我，我本身好開心，但係我聽其他人講先知係佢啲男仔friend送比佢既，而佢就用黎送比我…
第三，我地好似變返朋友咁。
佢已經好耐冇拖起我隻手、攬我。我有時會嗲下佢，佢會同我講你自己唔想嘔咩？唔好咁啦…甚至會fing開我。
糾結緊係唔係應該分手，身邊啲朋友都同意。
而家問題係我發現自己真係好鐘意好鐘意佢，其實我都唔知點解我會咁，其實佢完全唔係我個type，但可能係比佢一開頭一齊既時候既所有行為感動左，我係唔係應該放低然後分手？唔該大家，亦都多謝睇到呢度既你地。
願所有情侶都長長久久👩🏻❤️👨🏻