#NSS家庭
[Guest] 我十四歲就已經自己賺緊錢
我係一個14歲嘅女仔，讀緊band2學校，成績算中上。 開始之前都係感謝你睇我嘅分享，其實我冇特別嘅意思，我只係想分享一下我嘅故事，同埋聽一下人哋對我嘅諗法。🤍
我嘅屋企算中產家庭，爸爸一個月搵到三萬。 但係我哋屋企其好多人要養， 我仲有一個細路，都有一個喺外國讀書嘅哥哥（20歲），爸爸每個月都會畀佢五千蚊港紙做生活費，最近爺爺嫲嫲嚟咗我屋企，屋企負擔又大咗。
爸爸之前玩股票輸了30，40幾萬，媽咪好嬲，日日喺度埋怨， 開口埋口都係錢。 其實我好明白阿媽咪點解咁嬲，媽咪死慳死抵，平時買碗40蚊麵畀我食麵同配菜，佢自己留起啲湯自己整公仔麵，我好心痛，平時佢不會對我同細佬小氣， 只要我哋想要嘅，想食嘅，佢都會買畀我哋，細佬細我6年，無金錢理念，我理解，所以只有我一個人慳錢。
我都會同媽咪講：你食啦。
佢都講：我唔鍾意呀，留返你同細佬食啦。
每次我都好想喊，雖然我屋企唔係話好窮，冇錢，但係我媽咪成日用呢一種方法去對待我，搞到我其實心裏面對金錢呢一方面都唔係太開心。
直到舊年開始我就做一啲網店，就自己賺咗零用錢，除去成本其實每個月都係5，6百， 當然其實已經係好好㗎啦對我嚟講。但其實生意呢啲嘢唔穩定，有客就係有客，冇客就係冇客。
我亦都盡力讀好啲書攞獎學金。
唔知點解其實我對於金錢呢樣嘢真係覺得好辛苦， 父母成日因為金錢嗌交， 我真係好唔開心。
大概就係咁樣，多謝你哋都耐心睇咗我呢個post，可能寫得唔係太順，但係希望大家理解💙