#NSS文化
[GUEST] 其實睇咗咁多次「繁簡大戰」，頗有感觸，有啲嘢想講：
首先，有唔少人都話解決文盲率應該係加強教育，而唔係簡化文字。
然而，四五十年代嘅中國啱啱結束內戰，一窮二白，國內經濟疲軟，國庫空虛，分到落教育方面嘅資源可以話少之又少，經過多年戰爭後中國嘅文盲率又居高不下，但國家又急需人才發展經濟&科技喎，咁點算呢？既然冇錢加強教育，就惟有迫於無奈簡化現有文字喇。簡體字具有易寫、易學嘅特點(唔少考生為求快係作文考試中寫簡體字可以佐證到呢一點)。相比起繁體字，簡體字筆劃較少，學起嚟較快，寫起嚟亦都更方便，的確更適合當時中國內地嘅情況。因此，作為香港人嘅我哋，唔理解當時嘅情況，就更應該貼合當時嘅環境去睇，而唔係高高在上咁指責前人嘅選擇，做「事後諸葛亮」。
其次，有人話簡化文字會令文字喪失歷史意義同文化價值。
無可否認，部分簡體字粗暴咁將難寫嘅部分用另一文字取代(例如「難」同「难」)，令其喪失咗文字本身嘅韻味。但其實都有唔少簡體字自古已有(例如簡體字「尽」取自於草書)，簡化文字嘅行為亦都唔係現代先有，就例如「灋」簡化成為「法」等。所以講到底，大家抵制嘅都係無厘頭、亂咁嚟嘅簡化字，並唔需要一網打死所有簡化字，反之我哋應該同樣正視簡體字嘅好處，簡化字之所以誔生必定有佢嘅原因，且利處大於弊處先會被推行(唔少馬來西亞華校採用簡化字方案亦都佐證咗呢一點)，因此，係成效呢方面無需再爭議。
再者，有人就話簡化字會侵害香港本土文化
第一，我就唔明點解喇，因為香港本土文化本身就係中華文化同西方文化嘅結晶(我自己侵害自己？？？)，加上繁體字從來都唔係由香港人創造，更談不上係香港「獨有」嘅文化(冇人聽過英文係美國文化)，因此我並唔認為簡化字會侵害香港本土文化。相反，兩者共存先係硬道理，平時用繁體；速記用簡體(類似於古代楷書與草書共存咁)。需要指出嘅係，文化從唔係政治上嘅零和博弈，唔會因為「你」嘅出現，就代表「我」一定會消失。因為文化從不如政治般講求一定要擊敗對手，文化因一群人聚集而生；因一群人離散而死，只要呢一群人一直係度，文化便不會消散，就正如一直都有一群香港人堅守本土文化一樣。香港作為一座移民城市，大家祖輩均嚟自五湖四海，我相信香港容得下各種語言同文字，唔會容唔下簡體字。
總括而言，簡體字有好有唔好，但我哋唔應該為咗支持/反對，就選擇忽略哂佢嘅好處/壞處。
最後，重要搞清一個十分重要嘅概念，文字的本意係溝通，人類係為溝通便利先有文字嘅誔生。想問下大家：如果為美觀、歷史含意而舍便利嘅話，咁又算唔算係本末倒置呢？
最最最後，希望大家可以以客觀、理性嘅角度
看待事物，摒棄二元論，尊重他人嘅意見(無論你覺得啱定錯都好)，而唔係剩係識一味打壓排擠，或者盲目推祟追捧，更加唔好被所謂「媒體」帶風向或者被同温層呢個囹圄所禁固，要真正做到critical thinking。
小弟都係第一次投稿，如有1999請見諒
(意見不合都diu得輕力啲啊🥺