#NSS個人
[GUEST] 純粹up下，唔想睇可以skip。
距離last day倒數十日
要講遺憾，其實都冇乜。
曾經報過嘅活動、唔同post，一早已經冇晒，亦都已經睇化晒。但起碼我仲有班朋友，佢地係度陪我渡過咁多年，一齊笑一齊喊，已經好滿足。
唯一遺憾嘅係最後都係要同我鍾意左幾年嘅人分開。
曾經睇過篇文，其中一句係話：「我愛你，但我不喜歡你了。」呢句應該可以形容到我呢刻嘅心情。我同佢係朋友，由F4開始暗戀佢。我深知自己唔係佢重要嘅人，但係我制止唔到自己愛佢。我係淆底，唔敢表白，深知佢一定唔會鍾意我。keep住做朋友，至少可以一直陪係佢身邊。
自我識佢開始，我每日都好珍惜可以見到佢嘅時間，因為唔知邊日會分開，唔知邊日會冇得再見佢。所以，我將可以同佢一齊玩嘅每一日都記錄低，影好多相，每一日都好似最後一日咁過。
武肺最嚴重嗰陣，冇得返學，理所當然好多原本可以同佢一齊嘅時間就好似倒水咁消失晒。唔開心總有啲，但係起碼我地都keep住傾計，分享日常瑣碎事。呢啲瑣碎嘢我都默默紀錄低。每次同佢傾計，我都好開心，就算講嘅嘢係幾無厘頭、幾悶都好。
最後，時間終於開始倒數，倒數得越黎越大聲，逼我面對要離別嘅事實。
我唔知冇左佢嘅人生可以點生存，我唔知之後會變成點，我唔知10年、20年前之後會有咩改變。
我淨係想佢開開心心健健康康，比一個真正愛佢嘅人陪伴，過得幸福，有一班好姐妹陪佢。就算佢有一日真係唔記得左我都好。
我知佢幸福我就已經好夠。
有你嘅日子，我好開心。唔知你係咪呢？
我每日都睇返之前啲相，嗰份幸福依然令我繼續前進。多謝你，多謝你誕生係呢個世界上、多謝你係重重人海中同我做朋友、多謝你比左一個咁完美嘅高中生涯我，此生足矣。
下次再見，不如一齊食餐飯？