#NSS個人
[JCGSS] 大家好呀！我係一個應屆DSE考生，我簡單介紹下呢件事嘅背景先。尋日四點幾我就返咗學校攞嘢，因為下個禮拜要考mock。咁啱校長喺我所屬班別嘅課室幫我哋執緊啲嘢，噉我就敲門入去啦，過程中都係得我哋兩個人。攞完之後我同佢講唔記得帶locker鎖匙所以攞唔到locker啲嘢，佢就話:「聽日一定要清晒。」之類嘅話啦，噉我就諗住走㗎喇，但係佢就叫住咗我。
佢問我:「你有冇做嘢？」我以為佢指做卷就答咗冇，跟住佢話:「但係你媽媽話你有做part time喎。」我先get到佢講咩，噉我就話係。之後佢又問我做咩，我話餐廳，佢就問我屋企係咪等錢使，噉雖然我屋企係冇乜錢但都唔係話要靠我出去打工嘅，我係因為自己想做先去。之後佢又問我驚唔驚？噉我梗係唔驚啦，唔係又點會返，結果佢話:「但係我驚。」仲要邊講邊退後咗一步。之後佢又叫我要諗下身邊人之類噉啦，我先明佢想講咩。
由一開始政府「鼓勵」學生打針到依家，我係一針都冇打過，次次班主任問我都係話唔打，之前都有一個副校長叫我考慮下儘快打之類，但我覺得呢啲嘢係唔可以逼人，因為身體係我自己㗎嘛！好可能就係因為其他人打但我唔打，就畀說話我聽。
其實我返工都係返星期六日，呢排都成個幾禮拜冇返。唔使返工返學嘅時候我都係宅喺屋企好少出街，返工嗰陣我有戴好口罩亦都有用酒精消毒對手，點解要做退後嘅動作搞到我好似身上有病毒噉呢？我做咗啲咩危害到你先？我對你咳定係隨地吐痰呀？咁驚唔好出街啦，街上面咁多人咁多細菌。
我覺得我個職業畀人歧視，因為我哋所有員工同客人都好乾淨！同埋打針係個人選擇嚟，唔可以逼人！我尊重你係長輩，學校裡面最大粒嗰個，所以我唔會話你咁驚個垃圾病毒好蠢，但我覺得你後退嘅行為好唔尊重我！我明白你身為官校校長會因為學生唔打針而有壓力，但學生嘅健康唔係都好重要咩？想打咪打，唔想打咪唔打，好簡單。
遲啲可能唔打兩針就唔入得試場，但依家根本未正式宣布，所以現階段我絕對唔會打！經過呢件事之後更加唔想打。希望大家都唔好恐慌，因為未確定嘅消息而衝去打針，人一驚就會亂，容易做錯決定。雖然呢件事都唔係咩大事，但我在意到連瞓覺都諗緊，最後都係決定今日投稿！
最後，我想同所有仍然堅持緊嘅人講，可能到最後我哋都係要打，但絕對唔可以連試都唔試，咁快屈服！打呢篇文嘅時候我其實好淆底，我好驚會畀人秋後算帳（尤其呢間係官校），好驚學校知道之後會同屋企人講我上網唱衰學校。但係比起怕被篤灰，我更加怕其他人都會自我審查、自我噤聲，漸漸習慣冇言論自由嘅生活。雖然喺依家呢個環境有都等於冇 🙂
好啦我終於打完。呢篇文都幾長，我都知我講嘢有啲累贅，在此向各位表示抱歉。無論如何多謝睇到呢度嘅你，祝各位身體健康、學業進步、今年要考DSE嘅同學仔都加油！Thx admin！18/02/2022